Chief Minister in Mizoram Sports Meet a hawng

Mizoram Police Sports Meet vawi 20-na chu nimin khan Rajiv Gandhi Stadium, Mualpui-ah Chief Minister Zoramthanga chuan a hawng a, tun thla ni 21 thleng he Sports Meet hi neih a ni ang.

Mizoram Police Sports Meet hawnna ah hian Chief Minister chuan Mizoram Police-te chu Sports-ah hmahruaitu leh min tihhmuhtu, tun thleng pawh a discipline tam taka champion nihna la hauh thintu an nih thu leh entawn tlak taka an kal zel a beisei thu a sawi. Chief Minister chuan Sports chu Industry pawimawh a nih thu sawiin, Taksa leh rilru hriselna atan a that bakah eizawnna tha, sum tam tak lakluh theihna a nih avangin thalaite tan pawimawh a, hnam changkang zawkte pawhin an ngaihpawimawh thu a sawi a. Police-te chu thalaite entawn tlak ni turin kawng engkimah theihtawp an chhuah a beisei thu a sawi bawk a ni.

He hunah hian Mizoram DGP Devesh Chandra Srivastava pawhin Sports Meet-ah tum dang aiin inelna Event tam zawk dah a nih thu a sawi a. Ram pum huap Police inelna nen a inzul tura discipline thlan a nih thu leh Police-te mai bakah Officer nupuite tan pawha tel theihna tur thlenga inelna siam a nih thu a sawi a bawk.

Kum 1987 atang khan Mizoram Police Sports Meet hi neih thin niin kum 2019 thleng khan vawi 19 neih hman a ni a, COVID-19 hri leng avanga neih theih a nih loh hnuah kumin hian a vawi 20-na hi neih leh a ni a, Mizoram Police pumpui chu Contingent 11-ah then hran niin Contingent 11 atanga infiammi 1114 kalkhawm te chu intihsiakna (event) 18-ah an inel dawn a ni. Heng intihsiakna te hi Aizawl leh a chhehvel hmun 12-ah neih a ni anga. Athletics, Football, Taekwondo, Wrestling, Judo, Boxing, Basketball, Table Tennis, Chess, Lawn Tennis, Chess, Carrom, Chinese Checker, Shooting (Indoor), Badminton, Volleyball, Tug-of-War leh Strongest Man-ah te an inel dawn a ni.

Mizoram District Council a nih hunlai atang tawhin Mizoram Police hian Sport lamah mellung pawimawh tak tak a lo phun tawh thin a, kum 1971 atang khan Assam Rifles Football Team leh Mizoram Police Football Team-te chuan Independence Day Football Exhibition Match an lo khel tawh a, kum 1974-a 1st Battalion MAP din a nih atang phei kha chuan Mizoram Police chuan mumal zawkin Sport lamah tan a la a, ram pum huap inelna hmasa ber Mizoram Olympiad 1977-a Block Level intihsiakna ah sawm a nih angin Mizoram Police chu a chhuak ve a, Gold Medal 3 lai an la a ni. Mizoram Police hi Vawiin thlengin Sport-ah hmahruaitu leh infiammite hna pekna kawng sialtu pawimawh tak a ni a, Vawiin thlengin Top Flight Football (Mizoram Premier League) an la khel a ni.