Intodelh Inzirtir tura Pilot Project hawnna nei

Aizawl North-II bialtu MLA Dr. Vanlalthlana chuan nimin khan Aizawl-a Republic High School-ah ‘Intodelh Inzirtirna’ atan Pilot Project a hawng.

Intodelh Inzirtirna kawnga a bial chhunga hmalakna turah hian School pahnih te leh Tharthilthlentu (TiLi) te nen MOU ziah niin Zirtirna petu tur chu TiLi hian buaipuiin MLA Fund atanga pek thin a ni dawn a. Syllabus hran nei lovin, Entrepreneurial Mindset zirho, mi hlawhtlingte chanchin zir bakah Entrepreneurs-te nena inkawmhona hun neih thin a ni ang. Nimin-a hemi atana hmalakna tur hawnna ah hian Dr. Vanlalthlana chuan Intodelh Inzirtir tura Pilot Project atana Republic High School, Govt. Hrangchhuana High School leh Tharthilthlentu (TiLi) te nena hma an la ho thei tur chu lawmawm a tih thu a sawi a ni.

Dr. Vanlalthlana MLA chuan kan zirna hi hna zawng tur ni lova intodelh tur zawka kan her danglam hret hret a ngai tawh tih sawiin, kan phone kan update thin ang tho hian zirna, inchhung leh khawtlang inkaih-hruaina pawh hi Intodelh thei tur zawnga kan update zel a pawimawh thu a sawi bakah Career Guidance hun hmannaah pawh ‘Eng nge I nih dawn?’ tih ai chuan ‘Eng danglamna nge thlen i tum a, eng harsatna awmte nge i sut kian dawn?’ tia kan inzawh a hun tawh thu a sawi bawk.