Aizawl-ah Business Summit, 2022 neih a ni

Mizoram sawrkar-a Planning & Programme Implementation Department buatsaihin nimin khan Business Summit, 2022 chu RB McCabe Hall, Aijal Club-ah neih a ni.

Business Summit, 2022-ah hian Lalsangpuii, Additional Director, Commerce Wing, Commerce & Industries Department chuan Mizoram a Industries leh Tourism dinhmun tlangpui leh kan harsatna te sawiin, ramdang te nena thawhhona tur kawng hrang hrang awm thei te a tarlang a. Dr. Robert Lalrinsanga, Deputy Director, Directorate of Horticulture in kan ram thei leh thlai hrang hrang chungchanga hmalakna leh hmabak la awm te a tarlang bawk. Anni bakah hian Entrepreneurs aiawhin Mark Lalduhsaka, Executive Director, One Organic Partnership chuan entrepreneurs ten an zinkawng a an harsatna tawh tlangpui te leh an hmalakna hrang hrang te a sawi a. Zawhna leh chhanna hunte hman niin hlawkthlak takin sawihona neih a ni.

Business Summit, 2022-ah hian Esther Lal Ruatkimi, Principal Secretary to the Govt. of Mizoram, Commerce & Industries Department, Lalmalsawma Pachuau, Secretary to the Govt. of Mizoram, Planning & Programme Implementation Department te leh Department Officials te bakah Mizoram-a Startup leh Entrepreneurs thahnem tak an tel bawk a, Vanlalhuma, Ambassador of India to Slovakia leh Vinay Kumar, Ambassador of India to Myanmar te chuan khualtha niin an telpui bawk a ni.