Governor in Saitual leh Tamdil Wetland a tlawh

Mizoram Governor Hari Babu Kambhampati chuan nimin khan Tamdil Wetland tlawhin, Tourism Department, Environment, Forest & Climate Change Department leh Fisheries Department hmalakna te a endik.

Governor Hari Babu Kambhampati chuan EF&CC te enkawl hmunhma tlawh hmasa berin Tamdil Wetland hungchhung tinuam zel turin heng lai hmuna ramngaw te humhalh a pawimawh tih a sawi a ni. Forest Rest House, Tamdil hung chhungah State Tree, Herhse tiak a phun nghal bawk. Tamdil-ah hian Tourism Department ten mikhual thlen theihna In-te (cottage) 7, zan khat atana Rs. 1500 senga riah theihna an enkawl mek a. Heng Cottage te hi Governor chuan pawnlam khualzinmite hriatah pholan uar a pawimawh thu a sawi a. Tourism Department in Mizoram hmun hrang hrangah facility tha tak tak an neih te hi khualzinmite hip thei atana chhuanawm tak tak te an ni tih a sawi a. Advertisement leh kawng hrang hrangin Tourism Department chuan an thil neih te hi an tlangzarh thiam leh vawrh lar a ngai a ni, a ti.

Governor hian Tamdil Fish Hatchery a tlawh nghal bawk a. Helai hmunah hian Sangha chi kum khatah nuai 100 atanga nuai 200 thleng Sangha khawitute hnena sem turin an thar thin tih Fishery Officer te chuan an sawi a. Fisheries Official te chuan Saitual District chhungah hian Sangha khawi theihna tur hmun rem zau tawk tak a awm thu an sawi bawk a ni.

Governor hian niminpiah khan Saitual hi thlengin DC Conference Hall-ah Head of Office te, Bank hotute, Political Party hruaitute, Kohhran hruaitute leh tlawmngai pawl hruaitute nen inkawmna an nei nghal a, District la naupang tak ni mahse Saitual District chuan hmasawnna kawng a zawh mek niin a hmuh thu a sawi a. Faina kawngah Saitual District in State pum huapa intihsiaknaah District fai ber dinhmun a hauh nghal thei te chu chhuanawm a tih thu a sawi bawk.

He huna tarlan a nih danin kum 2018 khan Saitual chu District atan siam a ni a, kum 2019 atangin District Administration kalpui a ni a. Saitual District zau zawng hi 1757.34 sqkm niin Saitual-ah District Headquarters leh SDO Sub-Division (Sadar) leh Ngopa Civil Sub-Division te a awm a. Department hrang hrang ten District Office 23 an hawng tawh a ni. Saitual District-ah hian khaw 40 awm mekin mipui 61,108 bawr vel an cheng mek a, Faina kawngah phei chuan endikna neih hnuhnung berah khan Saitual District chu District fai ber lawmman a la a, thingtlang khaw lian te inelna ah Ngopa in pahnihna an hauh bawk. District chhungah hmalakna tam tak kalpui mek a nih thu leh venhimna chungchanga dinhmun te pawh he hunah hian tarlann a ni bawk.