Dampa Tiger Reserve-ah Sakei tlem tial tial
Dampa Tiger Reserve area-a rin luh vangin chhungkaw 456-in an chenna khua an chhuahsan tawh a. Hetihlai hian Sakei chhiarpui neih thina a lan danin Dampa Tiger Reserve area-ah Sakei a tlem tial tial a, tun dinhmunah pakhat a awm nia hriat a ni.
ZALEN-in RTI zawhna a siam, Environment, Forests & Climate Change (Field Director, Dampa Tiger Reserve)-a SPIO-in a chhan danin Dampa Tiger Reserve area a puan vanga an chenna khua chhuahsan chhungkaw 456 awm tawhin heng te hi Serhmun-ah 238 leh Andermanik-ah 227 te an ni a. Tiger Reserve-a puan a nihin relocation package cheng nuai 10 pek theih chi hnih (2 options) a awm a, Option 1-ah chhungkaw tin hnenah cheng nuai 10 zela pein Rehabilitation/Relocation process-ah Forest Department a inhnamhnawih tawh lo thung a. Option 2-ah chhungkaw tinin cheng nuai 5 an dawng ang a, a bak cheng nuai 5 zel chu khaw thar din nan (Community Development) hman niin, Rehabilitation/Relocation process-ah Forest Department-in a pui thin a ni. Dampa Tiger Reserve area a puan vanga an chenna khua chhuahsan chhungkaw 456 zingah hian Option 1 hnuaiah chhungkaw 227 (Andermanik-ah Option 2) te chu cheng nuai 5 zel pek niin chhungkaw 229 (Serhmun West-ah option 1) te chu cheng nuai 10 zel pek an ni.Dampa Tiger Reserve area chhunga rinluh tawh tun thlenga an khua la chhuahsan lo an awm leh awm loh chungchang-ah SPIO chuan, Serhmun West-ah chhungkaw 9 an khua chhuahsan lo an la awm tih tarlang bawkin, an sum (compensation) hmuh tur zat leh an ram hlutna in hen loa an ngaih vang a nih thu te, chhungkaw pem duh lo ten Court-ah thubuai an thehluh avangin Court thuthlukna ang zelin hmalak a nih tur thu a tarlang bawk.
Dampa Tiger Reserve enkawlna atan National Tiger Conservation Authority (NTCA), Ministry of Environment, Forests & Climate Change, Government of India atangin sum hmuh thin a ni a, kum 2018-19 ah cheng nuai 354.25, kum 2019-20 ah cheng nuai 373.12, kum 2020-21 ah cheng nuai 179.48 leh kum 2021-22 ah cheng nuai 405.31 hmuh a ni a, chungte chu thawktu hlawh atan hman a ni. Kum 2022-23 ah sum hmuh a la awm lo thung. Tun dinhmun ah thawktu 176 awm mekin heng te hi Regular Staff 13, Provisional Employee 2 leh CSS hnuaiah 161 te an nih thu SPIO chuan a tarlang bawk.
Dampa Tiger Reservce area-ah hian Sakei awm ngeiin Sakei chhiarpui-ah kum 2006-ah 6 a awm a, kum 2010-ah 5 awm anga record niin kum 2014 chhiarpuiah Scat Sampling hmangin pathum a awm nia chhinchhiah leh a ni a, tun dinhmun ah pakhat a awm nia chhinchhiah niin Sakei hmuh hnuhnun ber Camera trap record chu May, 2021-ah a ni.
Comments
Post a Comment