Electric Current man vangin mi 3 boral

Lawngtlai District chhung Rulkual khua-ah nimin khan Electric Current Line chhia siam a hnatlang Young Lai Association (YLA) Member mi 5 te chu Electric Current in manin a hmunah mi pathum an thi a, midang pahnih in hliam na tak an tuar bawk.

Rulkual atanga thudawn danin, tunkar Nilaini, October ni 12, 2022 khan Rulkual atanga km 4 vel a hla-ah thing tluin Power Line a vaw chat a. Line chhiatna hi ramhnuai, tlema khawih harsa lai deuh te a nih vangin Department lamin khawtlang lam punin nimin khan Power Department kaihhruaina hnuaiah hnatlangin Power Line chhia hi siam a ni. Hetia line chhia an siam mek lai hian vanduaithlak takin current a rawn kal thut a, chu chuan line siam a lo thawk mek te chu manin, a hmunah mi pathum, Samuel Lalthianghlima, Lalramdinpuia leh Lalrinchhana te an boral nghal a. Midang pahnih Lalrinenga leh Lalnghawrliana chuan hliam tuarin Lawngtlai lam panpui an ni. Heng vanduaina tawk a boral te hi kum 21-25 inkar mi vek nia thudawn a ni. Heng vanduaina tawka boral te ruang hi nimin khan an khua thlenpui niin nizan-a lumen a nih hnuah Vawiin hian vuiliam an ni ang.

Rulkual YLA President sawi danin, Rulkual line hi Bungtlang South line nen kalkawp a ni a, Bungtlang  South line hi chu a tha a, hetia an khaw line an siam lai hian Rulkual line lamah chuan power a awm lo a,  Bungtlang South line lamah hian power rawn kalin khawi emaw laiah heng line pahnih te hi an lo in tawk a nih an rin thu a sawi bawk.