PMAY-U kalpui mek thlirho

Serchhip District-a khawpuia mirethei In sak tanpuina, Pradhan Mantri Awas Yojana-Urban (PMAY-U) tanpuina dawngtu tur lo thlifimtu, District Screening Committee chu nimin khan Serchhip-ah thukhawmin PMAY-U 2nd DPR-a tanpuina dawng tura thlan, chhan engemaw avanga dawng leh theilo turte te chungchang an sawiho.

Serchhip DC Meeting Hall-a PMAY-U District Screening Committee thutkhawm hi an Chairman leh District Bawrhsap Nazuk Kumar IAS chuan kaihruaiin he hun hi Assembly Deputy Speaker leh Tuikum Bialtu MLA Er. Lalrinawma chuan a rawn hmanpui a, Serchhip District-a PMAY-U kalpui tawh chin te zawtfiahin, tanpuina dawng tura thlan tawh, inhnukdawk leh te chuan anmahni duhthlanna ngei a inhnukdawk an ni tih ziaka an dah a pawimawh thu a sawi a ni.

PMAY-U hi Serchhip District-a khaw-pui a puan pathum- Serchhip, Thenzawl leh North Vanlaiphai-ah kalpui niin 1st DPR kalpui a nih mek laiin tunah hian 2nd DPR hi kalpui leh mek a ni a, 2nd DPR hnuaia tanpuina dawng tur mi 985 te tan hian he ruahmanna inhrilhfiahna pawh kumin March thla khan neih a lo ni tawh a, kaih-hruaina siam angin tanpuina dawng turte hi 1st Instalment-ah Rs. 60,000/- leh 2nd Instalment leh 3rd Instalment-ah Rs. 30,000/- ve ve pek tur an ni a. Tanpuina dawng tura thlan te hi tanpuina an dawn hmain an dinhmun zawhfiah leh vek niin hetah hian tanpuina dawng tura thlan zingah mi 34 te chu tanpuina dawng tur atangin paih an ni a, tunah hian midang 14 te chu paih leh tur an awm leh bawk a. Thenzawl-ah tanpuina dawng tura thlan mi 296 awmin heng atang hian dawng theilo tur mi pakhat a awm bawk a ni.

PMAY-U hnuaiah hian Serchhip tan DRP pathum (3) leh Thenzawl leh North Vanlaiphai tan DPR pahnih (2) ve ve siam a ni tawh a, tanpuina dawng tur atanga paih leh zinga a tam ber te hi mahni inhnukdawk niin sum harsat vang leh In neihsa thiah phal loh vang te nia thudawn a ni.