Mizoram Governor in Kolasib District tlawhin Vawiin-ah ramri-a Police Duty-na a tlawh dawn

Mizoram Governor Dr. Hari Babu Kambhampati chuan nimin khan Kolasib District tlawhin Kolasib District thuneitute leh khawtlang hruaituten an lo hmuak a, Department hrang hrang hotute nen Kolasib District tih hmasawnna tura Sawrkar laipui Scheme kalpui dan te sawiho.

Kolasib tlawhtu Governor Dr. Hari Babu Kambhampati hi DC Circuit House Conference Hall-ah Kolasib District chhunga Department hrang hrang hotute nen inkawmna neiin he hunah hian Governor chuan Kolasib District chhunga Rel kawng siam mek leh Four Lane kawng siam tura ruahmanna te chuan inkalpawhna kawngah hmasawnna nasa tak a thlen tur thu leh Zofate tan leh State pawn mite tan pawh inlaichinna tha a thlen phah ngei a beisei thu a sawi a. Mizoram tan hmasawnna hmel thar a thlen ngei a rin thu a sawi.

Governor chuan Sawrkar Department hrang hrang chuan mipui nawlpui thleng pha hmasawnna hna ngai pawimawh turin a chah a, Sawrkai laipui ruahmanna a Scheme hrang hrangte chu mipui tan a duan a nih angin mipui hne a hrilhhriat leh a hamthatnate pawh mipuiin an tel ngei theihna tur a mawhphurna chu Sawrkar hnathawkte leh Bank-a thawktute kutah thui tak a innghah thu a sawi a. Mizoram chhunga kawlphetha siamchhuahna pawimawh tak pahnih Kolasib District chhunga awm te tarlangin, intodelh theihna leh hralhchhuah tur thlenga siamchhuah theihna Mizoram chuan a neih thu a sawi a, chumi tur chuan ngaihtuahna sen a tul thu a sawi bawk.

He hun ah hian Kolasib District Bawrhsap John LT. Sanga chuan kalkhawmte lawmna thu sawiin, Kolasib District chanchin tlangpui a tarlang a, Kolasib SP Vanlalfaka Ralte chuan dan leh thupek kenkawh kawng a hnathawhna kalpui dan leh ramri venhim kawng a Police-te hmalak dan a tarlang bawk a ni.

Governor Dr. Hari Babu Kambhampati hian Circuit House, Kolasib-a hun a hman zawh hian Vairengte-a Counter Insurgency and Jungle Warfare (CIJW) School-ah zanriah a ei a. Vawiin hian Vairengte ramri-a Police duty-na hmun thlawhin hun a hmang leh ang a, Vairengte khaw chhung a Sawrkar laipui Scheme kalpuite a hmun ah a tlawh dawn bawk a ni.