AB&ABC Scheme chungchang zirhona nei tan

Agri-Clinics and Agri-Business Centers (AB&ABC) Scheme chungchang zirhona ni 45 chhung neih tur chu nimin khan Agriculture Minister C. Lalrinsanga chuan Aizawl-a SAMETI Conference Hall-ah a hawng.

AB&ABC Scheme chungchang zirhona in a tum ber chu lehkhathiam ten Agricultural Sector-ah eizawnna an neih nana hmalak a nih bakah loneitu te thleng phak thiamna an pekchhuah theih a ni a. 'Better farming by every farmer' tih chu thupui niin mi 23 te hi Agriculture and Allied Subjects, Environmental Science, Botany, Zoology, Chemistry Subjects leh M.Sc degree nei an ni a, he Scheme training hnuaiah hian Project indicatives 32 a awm bawk.

He trainign hawnna hunah hian Agriculture Minister chuan thalai lehkhathiam training tura lo penchhuak te chungah lawmthu sawiin, ni 45 training tur a nih angin zuih ral lo turin a chah a, Mizoram hmel ti danglam theitute an ni tih hre rengin hmarchhak state zingah SAMETI, Mizoram chu training buatsaih thei awmchhun an ni tih a sawi. Agriculture Minister chuan thalaite zingah intodelh pawimawh zia hretu an pung zel a, chu chuan kan ram economy chawisang kawngah hmasawnin min siam ngei ang, a ti a. Ram dinchhuah nan incheina mawi ber chu thawhrimna hi a ni tih pawh sawiin, Thiamna chu eizawnna a chantir leh pawisa a chantir chu he Scheme in a tum pakhat a nih angin he Training hian rah tha chhuah sela, hmathlir thui tak neiin, hlawk theih ang bera training chu hmang turin a ngen a ni.