COVID-19 kai thar 30 leh dam 23 awm belh leh

Niminpiah khan Mizoram-ah Sample 378 enfiah niin heng atang hian COVID-19 hri kai mi 30 hmuhchhuah an ni a, Sample enfiah atanga za zela 7.94 ten hri kaiin Mizoram-a hri kai enkawllai pawh an pung ve leh hret a ni.

Niminpiah khan Mizoram-ah Rapid Antigen Test hmangin Sample 351 enfiah niin heng atang hian COVID-19 hri kai mi 27 hmuh an ni a, Mamit District-ah 11, Saitual District-ah 6, Aizawl District-ah 4, Serchhip District-ah 3, Lunglei District-ah 2 leh Khawzawl District-ah mi pakhat te an ni. Heng bakah hian ZMC-a RT-PCR Laboratory-a Sample enfiah 11 atangin COVID-19 hri kai mi pahnih hmuh an ni a, Lunglei District-a TrueNat Laboratory-a Sample enfiah 11 atangin hri kai mi pakhat hmuh a ni bawk.

Nimin khan tlai dar 5:00 thlengin Mizoram-ah COVID-19 hri kai mi 23 enkawl dam an awm belh leh a, heti hian nimin tlai thleng khan Mizoram-a COVID-19 hri kai hmuhchhuah tawh chu 2,28,434 niin an zinga 2,27,640 te chu enkawl dam an ni tawh a, hri kai hmuhchhuah tawh atanga chhutin za zela 99.65 te chu enkawl dam an ni tawh a, hri kai enkawllai mi 94 awmin hri kai zingah mi 700 an boral tawh a ni.