Tripura-ah Mizoram Bru 2500 inbengbel tawhin Mizoram Electoral Roll atangin paih an la ni lo
Tripura Relief Camp a awm Bru chhungkaw 6,959 zinga chhungkaw 2,500 bawr vel te chuan Tripura a an inbenbelna tur hmun an luah fel tawh a, hetihlai hian Tripura sawrkarin chhawmdawlna an dawn tur ang a la pek kim loh avangin Mizoram Electoral Roll atangin paih theih an la ni lo thung.
Tripura Relief Camp-a awm Bru chhungkaw 6,959 te hi sawrkar laipui leh State pahnih sawrkar aiawh ten inremna an siam angin Tripura-ah hian an inbengbel dawn a, hemi chungchanga Mizoram Bru Displaced People Forum (MBDPF) Gen. Secretary Bruno Msha-a sawi danin, Tripura a an inbenbelna tur hmun luah fel tawh te hi Gomati District-ah chhungkaw 200 vel, Dhalai District-ah chhungkaw 700 bawr vel, North Tripura District chhung, Khahamphaipara-ah chhungkaw 370 vel, Hamsapara-ah chhungkaw 200 vel, Kaskau-ah chhungkaw 600 bawr vel leh Kanchanpur Sub-Division hnuaia Bandarina-ah chhungkaw 400 bawr vel, an vaiin chhungkaw 2,500 bawr vel an ni.
Kum 2020 January thla khan sawrkar laipui, Tripura sawrkar leh Bru pawl aiawhte chuan Tripura-a inbenbelna tur hian inremna an lo ziak tawh a, Bru Refugee te chu an awmna tur ram ft 40X30 a zau pek tur a ni a, Fixed deposit in Rs. 4,00,000 dahsak tur an nih bakah, kum hnih chhung thla tin Rs. 5,000 leh a thlawnin ration pek tur a ni a. MBDPF Gen. Secretary Bruno Msha sawi danin, Tripura sawrkarin chhawmdawlna hrang hrang a kalpui mek a, inremna ziah anga chhawmdawlna dawng kim erawh tun thlengin an la awm lo thung a ni.
Chief Electoral Office (CEO) Mizoram hotute sawi danin, Tripura Relief Camp-a awm Bru te chu Tripura sawrkarin chhawmdawlna a pek fel hunah Tripura Electoral Roll-ah thun an ni ang a, chumi hnuah chuan Election Commission of India (ECI) lam pawhin Bru te chu Mizoram Electoral Roll atanga paih an remtih nghal beisei a ni bawk a ni.
Tun dinhmunah Tripura Relief Camp a awm Bru zinga Mizoram-a vote nei mi 11,772 zinga mi 8,885 te chuan Mamit District-ah vote an nei a, mi 1,979 in Kolasib District-ah vote neiin mi 908 in Lunglei District Chhung ah vote an nei bawk a ni.