ASF hluar leh mekin Vawk lakluh khap thar leh a ni

Kumin chhungin Mizoram-a khua leh Veng 24-ah African Swine Fever (ASF) vangin Vawk 384 a thi tawh a, State pawn leh ramdang atanga Vawk lakluh chu tiamchin awm lovin khap leh a ni.

Vawk Pul hri, African Swine Fever (ASF) vang hian nikum March thla khan Mizoram ah Vawk thi awm tanin Inrinni thlenga Mizoram-a ASF vanga Vawk thi tawh zat chu 30,208 a ni a, March 2021 leh December 30, 2021 chhung khan Mizoram-a khua leh veng hrang hrang 272-ah ASF vangin Vawk 29,824 a thi a, ni 35 chhung Mizoram-ah ASF vanga Vawk thi a awm loh hnuah February 4, 2022 khan Vawk thi awm lehin ASF nia rinhlelh a nih avangin zirchianna neih nghal a ni a, March 7, 2022 khan ASF vanga thi a ni tih finfiah niin kumin February 4 hnu lamah Champhai Electric Veng-ah hian ASF vangin Vawk 64 a thi tawh a ni.

Hetianga ASF hri a lên thar leh hnu hian khaw hrang hrangah ASF vanga Vawk thi hi hriat tur a awm leh tan mek a, ASF vanga Vawk thi tamna ber, Aizawl District-a Sakawrdai khuaah chuan kumin February ni 23 khan Vawk thi awm tanin, March 7, 2022-a finfiah a nih hnuah Vawk 134 a thi tawh a. Aizawl District-a khua leh veng hrang hrang 11-ah ASF vangin Vawk 229 a thi tawh a, Lunglei District-a Chhumkhûm khuaah vawk pahnih, Champhai District-a khaw paruk ah Vawk 109, Kolasib District-a khaw pali-ah Vawk 39 leh Saitual District-a khaw pahnihah Vawk panga a thi tawh bawk a ni.

Tunhnaiah ASF vanga Vawk thi an pun belh leh zel avangin Inrinni khan Disaster Management Authority SEC Chairman leh Mizoram Chief Secretary Dr. Renu Sharma chuan State pawn leh ram dang atangin tiamchin awm lovin Vawk lakluh a khap a. Chief Secretary chuan Mizoram pawn atangin vawk vulh tur leh talh tur bakah Vawksa ei tura lakluh a khap a ni. Chief Secretary chuan AH&Vety Department te chu Mizoram chhunga vawk vulhna hrang hrang te fai taka enkawl anih theihna turin uluk taka endik turin a chah a, Department chu ASF avanga Vawk thi te sawngbawl kawnga felfai taka ruahmanna siam tuin a chah bawk a ni.