Inkhawm kaihhruaina siam thar niin Mizoram-ah zan lama inkhawm khap leh rih a ni

COVID-19 hri leng mek avangin Serchhip District-ah Inkhawm kaihhruaina tihchhuah thar a ni a, Biak In-ah zai khap niin Mizoram pumah zan lama Inkhawm phal a ni tawh lo bawk.

Tunhnaiah Ser-chhip District-a COVID-19 hri kai hmuhchhuah an pun hnuah Serchhip District Bawrhsap Kumar Abhishek chuan nimin khan thuchhuah siamin Inkhawm chungchangah kaihhruaina thar a siam a, he thuchhuah ah tunhnaiah India ram chhungah COVID-19 hrileng nasa takin a rawn pun thu leh Mizoram-ah pawh hrileng a pung chho mek zel bawk tih tarlangin, Serchhip District pawh positivity rate sang ber zingah kan la awm a. Hei vang hian COVID-19 hrileng mek lakah khawtlang leh kohhran mipuite kan lo him zel theih nan Biak In Inkhawmnaah zai phal a nih loh thu leh Biak In-a leng zat atangin 50% (zaa sawm nga) bak inkhawm phal a ni lo tih a tarlang a.  Inneih inkhawm leh Kohhran thil tih hrang hrangah ei leh in siam phal a nih loh thu leh Mimal leh pawl thil tih khawmah ruaitheh phal a ni lo tih a tarlang bawk.

Hetihlai hian Mizoram sawrkar chuan nimin khan thuchhuah thar siamin Vawiin, January 8, 2022 atanga tun thla ni 31 zanlai dar 12:00 thlenga hman tur inkaihhruainaa thar a tichhuak a. Mizoram puma inkaihhruaina tur siam thar ah Sakhaw Biak In-a inkhawm leh Inkhawmpui chungchangah CAB khauh taka zawm chungin chhunah chauh Biak In-a leng zat chanve aia tam lovin Kohhran Inkhawm pangngai neih phal niin zing leh tlai tawngtai inkhawm pawh phal a ni a. Class I atanga Class IX leh Class XI zirlaite tan Sikul leh Hostel khar tur niin Online in Class lak chhunzawm tur a ni a, Class X leh XII Board exam turte tan CAB zawm chunga zirna In hawn phal a ni a, Zirna sang zawk (Higher education) te chu Online a kal chhunzawm tur a ni bawk ang.

DC ten an huamchhunga VLTF leh Dawrkar Association te nen dawr inhawn chhak dan tur an ruahman anga, Restaurant te chu a hmuna leng zat chanve chin luahkhatin hawn phal a ni a. Tui emaw, tuiril lam chi hrim hrim emaw in intawm tur ven nan a neitu ten dispo no emaw, no pangngai emaw, tui bottle emaw, mi tin tan a hran theuh an chhawp thin tur a ni bawk. Hei bakah hian zan dar 9:00 atanga zing dar 4:00 thleng Curfew pawh kalpui chhunzawm tur a ni leh dawn bawk a ni.

Comments

Chhiar Hlawhte