Serchhip District-ah hri kai hmuh tam ber ni a thleng leh ta

Serchhip District-ah nimin khan COVID-19 hri kai hmuh tam ber ni thleng lehin nimin bikah hri kai mi 147 zet hmuh leh an ni.

Krismas leh Kum-thar lawmna neih zawh a nih hnuah Serchhip District chhung khaw hrang hrangah COVID-19 hri kai hmuh an pung zel a, nimin khan hri kai mi 147 zet hmuh leh niin Serchhip District-ah ni khat-a hri kai hmuh tam ber ni a thleng leh a, a hmaa hri kai hmuhchhuah tam ber ni, tun thla ni 4-a hri kai 122 hmuhchhuah chu a rawn khum leh a, tunkar-ah ni 5 chhungin hri kai mi 466 zet hmuh an ni tawh bawk a ni.

Nimin a hri kai hmuhchhuah thar zinga 36 te hi East Lungdar khua ami te niin Bungtlang khua ah hri kai mi 35 hmuh an ni bawk a, Serchhip khua ah hri kai 27 hmuh niin Sailulak-ah 21, Piler-ah 10, Thenzawl-ah 7, Lungpho-ah 6, Chhiahtlang-ah 4 leh Sialsir khua ah mi pakhat te an ni a, Serchhip-a hri kai hmuh pakhat hi TrueNat Laboratory atanga hmuh a ni thung.

Nimin khan Serchhip District-ah hri kai mi 17 te enkawl dam an ni ve leh a, heti hian Serchhip District-a hri kai hmuh tawh zawng zawng chu 6424 niin an zinga 5808 te chu enkawl dam an ni tawh a, hri kai hmuhchhuah atanga za zela 90.41 te enkawl dam an ni tawh a ni. Serchhip District-ah hian hri kai enkawllai mi 596 zet an awm leh tawh a, hri kai te zingah boral awm belh lovin mi 20 an boral tawh a ni.

Comments

Popular News (Last 30 Days)

Bawngchawm tlang khualbuk rawktu nia hriat mi 2 man