Governor leh Oil Marketing Company an inkawm

Mizoram Larsap Dr. Hari Babu Kambhampati chuan nimin khan Mizoram-a Oil Marketing Company hotute leh an aiawhte chu Raj Bhavan-ah a kawm.

He inkawmna ah hian Oil Marketing Company – Indian Oil Corporation Limited (IOCL), Bharat Petroleum Corporation Limited (BPCL) leh Hindustan Petroleum Corporation Limited (HPCL) hotute leh an aiawhte telin Larsap chuan Mizoram-a tuialhthei leh eirawngbawlna Gas dinhmun te, Company ten mipui mamawh an phuhru em tih te leh mipui mamawh pekna kawnga harsatna an tawk em tih te, Ujjawala Scheme thlen chin leh a kalpuina kawnga harsatna a awm te, harsatna awmte chu engtia sutkian thei nge a nih tih te hriatchian a duh avanga meeting hi koh a ni tih sawi.

Governor chuan Oil Company te chu Aizawl leh District Headquarters-ah te eirawngbawlna Gas tuna Point Delivery a sem mek chu Home Delivery angin hmun tam zawka sem anih thei nan hma la turin a hrilh a. District hotute nen thawkhoin mirethei te tana Gas Connection pekna sScheme – Pradhan Mantri Ujjwala Yojana (PMUJ) dawng thei te chu chhinchhiah a, heng ten gas connection an neih vat thei nan chak zawka hma la turin a hrilh bawk a ni. Siaha-ah Petrol Pump pakhat chauh awmin mipui mamawh a phuhru tawk lo tih sawiin, IOCL lam chuan pump dang pakhat hawn belh thuai a ni dawn tih an sawi a ni.

IOCL chuan Mizoram-a tuialhthei leh eirawngbawlna gas chung-changa thil hrang hrang - tuialhthei an phurluh dan leh Petrol Pump dinhmun te, tuialhthei pawlhdalh venna atana tunlaia khawl hmanga an vil dante; Mizoram-a eirawngbawlna gas phurhluh, sem dan chungchang te leh hemi kawnga harsatna awm te; Mualkhang Gas Bottling Plant tihlen chungchanga an hmalakna tawhna te leh PMUJ an kalpui dan leh a dinhmun te an tarlang a. HPCL aiawh pawhin Mizorama an Company in hma an lak dante an tarlang bawk.

IOCL in Mizoram pumah Petrol Pump 52 leh LPG Distributor 60 an neih mek thu te, kum 3 chhungin pump 30 dah belh an tum thu te, kum 3 chhunga Mualkhang Gas Bottling Plant tihchangtlun a ni tur thu te, hemi atan cheng vbc. 180 bawr an sen tur thu te, tihchangtlun anih hnua Mizoram mamawh chu kum 30 lo awm tur thleng an phuhruk beisei anih thu te leh Rel-a chawm tuialhthei dahkhawlna hmun tur Rail Fed Depot sak anih theih nan ram an zawn mek thu te te an sawi a. HPCL in Mizoram pumah Petrol Pump 7 an nei mek thu leh 2024 thleng pump dang 32 hawn an tum thu te an tarlang tel ve bawk a ni. FCS&CA hotute pawhin eirawngbawlna gas sem dana Local Council leh Village Council te nena an thawh dan chungchang te an sawi bawk a ni.