C&I Minister in MIMA Office Aizawl-ah a hawng

Commerce & Industry Department changtu Minister Dr. R. Lalthangliana chuan nimin zing khan Mizoram Merchant Association (MIMA) Office building thar, Aizawl New Market-a mi chu a hawng.

MIMA Office building thar hawnna ah hian Dr. R. Lalthangliana chuan tunhma a helai hmun bawlhhlawh leh tawp tak ni thin MIMA-ten thianghlim leh felfai taka an lo siam ta chu lawmawm a tih thu a sawi a. Covid donaah pawh MIMA-te nen an thawhhona a that thu sawiin, heng lai Bazar Area hi Mizoram-ah chuan kan market lian ber a nih avangin sawrkar pawhin a ngai pawimawh hle a ni, a ti bawk. Helai hmunah hian tuna cheng vbc. 36 hmanga ruahmanna kal pui mek bakah, Smart City Project cheng vbc. 34 man tur ruahmanna dang a kal mek bawk tih Minister chuan sawiin, “Civil Hospital, Aizawl tawt lutuk turte pawh khi siamrem dan kan ruahman mek a, Trauma Centre atan ruahman felfai tak kan nei tawh a. Civil Hospital tlak lam pang liam, hmun ruak pawh khi Doctor leh Nurse-te quarter awmna tur mumal takin DPR kan siam mek bawk a ni,” a ti.

He hunah hian khual zahawm bialtu MLA leh Minister Robert Romawia Royte pawhin Hnam changkang Sociey-ah sumdawng an tam a, ram changkang a piangah sumdawng dinhmun a sang a. Mizoram-ah pawh MIMA te hnathawh hi Zoram hmasawn nan a pawimawh hle a ni, a ti a. Mizote hi mahni ram chhungah chauh ni lo, State dangah pawh kan sumdawng thei tih sawiin, “Sumdawng pawlte hian Langkaih leh Tiau kar ringawt ngaihtuah lovin, ram ril zawkah hak i zauh zel ang u,” a ti bawk.

Comments

Popular News (Last 30 Days)

LPG man bithliah thar