Chief Minister in Mizoram thil pawimawh hrang hrang Sawrkar laipui hotute a sawipui thu a sawi

Mizoram Chief Minister Zoramthanga chuan tunhnaia Delhi a zinnaah Assam nena ramri buai chungchang te, Bamboo Link Road chungchangte leh Assam Rifles sawnchhuah bakah Myanmar raltlan tanpui dan tur chungchang te leh Mizoram mamawh hrang hrang thlenin sawrkar laipui hruaitute a sawipui thu a sawi.

Nimina Chief Minister Office (CMO)-a thuthar thehdarhtute a kawmnaah Chief Minister Zoramthanga hian, Assam leh Mizoram ramri buai chungchangah Union Home Minister Amit Shah hovin Assam Chief Minister Himanta Biswa Sarma te nena boruak tha tak hnuaiah an sawi ho thu a sawi a. “Ramri chungchangah tha takin Dawhkan-ah inbe tlangin, boruak thain siam rem tum zel ila. Chu chauh ni loin, State pahnih aiawh insiamin, chu'ngah chuan Opposition lam leh midangte pawh telin kan aiawh ve ve te'n thil sawiho sela, a tul ang zelin Chief Minister Level-ah pawh inbe zel ila tiin Amit Shah hoin tha takin kan sawiho a ni,” a ti.

Union UD&PA Minister Hardeep Singh nena an inkawmnaah Vaivakawn leh Bawngkawn-a Flyover chungchang te, Chaltlang Bus Terminal te siamna atana thuphunga remtihsak ni tawhin, hmalak tak tak theih a ni dawn em tia Feasibility Report an pek pawh pawm a nih tawh thu a sawi a. “Detail Project Report in rawn siam ang a, insiamna atan pawisa pawh kan rawn sanction dawn tiin min hrilh a. He'ng siamna atan hian a mamawh tawka an chhut kha cheng nuai 68 a ni,” tiin, Union Minister hian an rawn sanction nghal tur thu leh tunkar chhova a lo thlen an rin thu a sawi bawk.

Bamboo Link Road chungchangah Chief Minister hian Union Finance Minister Nirmala Sitharaman-i'n a bul tanna atan cheng vbc. 100 man DPR siam phawt tura a tih thu a sawi a, “A bul tanna'n Pilot Project angin cheng vbc. 100 kha rawn ti ula, khata tang khan a than zelna tur kan ti dawn nia an ti a,” tiin, hmasawn zel a nih chuan a chi phun tur ngah dan a zir te, sanction a tam dan a zirin a chiin an umzui tur thu a sawi a. Zawhna chhangin, “A hmingah Bamboo Link Road kan ti mai a, a nihna takah chuan Economic Road a ni mah mah zawk. Mahse, Economic Road tia a hming kan vuah chuan State tin hian 'ka duh ve' an rawn ti anga, an inchuhna karah an buai ang tih kan hlau a. Mi sak ve theih loh hming Bamboo Link Road kan ti a ni,” a ti.

Mizoram in All India Service-ah Cadre thar a neih a pawimawhzia a sawi chu, 'In nei ngei tur a ni,' tia Prime Minister in a lo chhan thu a sawi a. “Ka'n tur phei chu Prime Minister hmasa atangin in nei ang an tia, a tul a ni an ti. Mahse, Covid-19 te a lo nia, a ball hi nam lum lohin a awm zel a. Hei lehkha ka rawn pek sirah endorse la, Secretary incharge hnenah a bul tanin ball lo nam lum la, file lo move rawh tiin ziak la,” tia a nawr thu a sawi bawk.

Mizoram Chief Secretary thlak a nih dawn leh dawn loh chungchangah Chief Minister hian, “Tawng thuah ni lo tuna Mizoram Chief Secretary hi a hranpain duh lohna kan nei loa, a tha kan ti. Amaherawh chu, tawng hi a ni ber a. Hemi thuah Prime Minister Narendra Modi pawh kan hrilh a. 'Kan rawn ti ang' a ti ngei mai a. Mizo IAS te pawh ziakin kan hrilh a. Seperate Cadre kan neih loh chuan Chief Secretary tling pha Mizo kan nei tlem tawh avangin kan buai dawn a. Seperate Cadre min pek vat a ngai tih nawrna'n ka hmang nghe nghe,” a ti bawk.

Myanmar buaina avanga Mizoram a raltlante chu Mizoram sawrkar chuan a lang a pauvin a puih thu te, pawisa pawh sanction a awm thu te, NGO, Kohhran leh Zirlai pawlte bakah mipuiin chhawmdawlna pe a an lo tanpui theih dan Prime Minister hnena a hrilh thu a sawi a, “In pui zel theia a tha e. Mizoram sawrkar in kan puih zel theihna turin India sawrkar hian ruahmanna rawn siam an tum a ni,” a tih thu leh Mizorama raltlan lo lut hi mi 14000 chuang an awm tawh thu a sawi bawk.

Comments

Popular News (Last 30 Days)

Vawiin-ah HSLC result

Vawiin-ah HSSLC Exam result