Serchhip damdawi In-a thihna thleng chhuichiang turin Minister leh DC te ngen

Serchhip Thalai Pawl (STP) te chuan tunhnaia Serchhip damdawi In-a thil thleng chungchang chu a tul anga chhui chianga hma lak sak turin nimin khan Health Minister leh Serchhip District Bawrhsap hnenah ngenna thlenin hemi chungchang hi bialtu MLA pawh an hriattir nghal bawk.

Nimin a Health Minister leh Serchhip District Bawrhsap hnena lehkha an thehluh ah hian Serchhip Thalai Pawl te chuan Oct. 31, 2021 zan dar 8:30 khan Sialsir khaw nausen chu Serchhip Damdawi In-ah boralin hemi chungchangah hian Damdawi In-a thawktute inthlahdah vang nia sawiin Social Media-ah thu thehdarh a ni tih an sawi a. Tunhnai Dec. 3, 2021 zan khan Malsawmkimi w/o Zaithankima, Tlangpui khua Serchhip Damdawi In a nau nei chu nau chungah thiin naute nen an boral ve ve tih pawh sawiin, hemi chungchangah pawh hian a tuartu lam chuan Doctor te ngaihsak tawk loh vangah ngaiin an rilru a na hle tih an tarlang a ni.

STP chuan sawrkar in nausen thihna leh Nau chunga thihna a thlen lohna tura programme te duanga hma a lak mek lai a, tunhnaia tum hnih ngawt Serchhip Hospital-a thihna thleng leh mi pathum lai an boralna hi a pawi in Serchhip tan pawh a mualphothlak hle a an hriat thu an sawi a. Thil thlen dan chungchangah thil chianglo leh a thawktu lam demna a tuartute atangin a tam thu leh Social Media lamah pawh sawizui a hlawh thu tarlangin, hetianga Serchhip in sawrkar damdawi In kan neihchhunin dem a kai leh sawisel a hlawh a reng mai hi thalo an tih thu leh sawrkar damdawi In a hetiang thil a thleng hi a pawi tih an tarlang a. “Chuvang chuan miten sawrkar damdawi In hi innghahna leh damlo te tan pan tlak a ni ngei tih lantirna turin tun tuma thil thleng chungchang hi chhuichian a tulin kan hria a. He thil thleng chungchangah hian Hospital lam inrelbawlna diklo emaw, a thawktute lamah felhlel deuh a awm ni a ngaih theihin thu a thang,” tiin hetiang anih avang hian tunhnaia Serchhip damdawi In-a thil thleng chungchang hi a tul anga chhui chianga hma lak sak turin Health Minister leh District Bawrhsap te hi an ngen a. Health Minister lehkha tur hi pdf copy siamin nimin khan thawn a ni a, DC lehkha tur hi amah a awm remchan loh avangin DC Office-a SDC, F. Lalnisai hnenah hlanin a tul anga hma an lo lak tur thu a sawi bawk a ni.

MHIP Sub-Hqrs. Serchhip pawhin nimin khan thutkhawm neiin Serchhip damdawi In a thil thleng chungchang hi an sawiho a, he thihna thleng hi pawi an tih thu leh an tawrhpui thu sawiin, “Hetiang vanduaina thleng thei hi kan pumpelh theih nan thuneituten chhui chiangin hma la ngei se kan ti,” tiin Resolution siamin an pass a ni.

Serchhip Sub-Hqrs. YMA pawhin nimin tlai khan OB thutkhawm neiin he thil thleng hi an sawiho bawk a, he thil thlen dan kimchang hre turin hma an la mek tih Sub-Hqrs. YMA Secretary chuan a sawi bawk.

He thil thleng a nunna chan ta Malsawmkimi awmna, Tlangpui khua a YMA, MUP, MHIP leh Tlangpui Student Union te chuan nimin khan thuchhuah intawm siamin Malsawm-kimi nau neih chungchangah thil fel lo awma an hriat thu leh heng thil fel lo te hi a ranglama chhui chhuaka, dan anga Action la turin thuneitute an phut thu an sawi a, “Taksaa harsatna lian tham pawh nei lo, raicheha an thih tir thei hi hriatthiam harsa kan ti a. Mawhphhrtute hi kan dem takzet a, mihring hlutna an hre lo hle ah kan ngai a. Doctor hian Pi Malsawmkimi taksa dinhmun hrechiang lova treatment a pe mai hi kan dem takzet a, tun hnuah hetiang hi thleng tawh lo se kan ti,” tiin a tuartu chhungte hnenah zangnadawmna cheng nuai 5 aia tlemlo pe tura sawrkar an phut thu an sawi bawk.

Comments

Popular News (Last 30 Days)

Bawngchawm tlang khualbuk rawktu nia hriat mi 2 man