Ramri chungchangah Mizoram sawrkar in a tanhmun tichiangin document a nei tha thawkhat tawh

Home Minister Lalchamliana chuan ramri chungchangah Mizoram sawrkar chu 1875 BEFR Notification-ah a dinngheh thu sawiin, Assam lam chu 1933 Notification-ah an ding thung tih sawiin, Mizoram sawrkar chuan a duh angin a tanhmun tur te tichiangin document te pawh a nei tha thawkhat tawh tih a sawi bawk.

‘Mizoram leh Assam Ramri Buaina’ tih lehkhabu Lalthuamliana, Asst. General Manager, SBI (Rtd) in a buatsaih tlangzarhna hun nimin-a Synod Multipurpose Training Center Hall, Aizawl-a neih ah he thu hi sawiin Home Minister chuan kum 2018 February thla-a Zophai-a Mizo zirlaite buk sak Assam sawrkarin a rawn thiah sak a, silai hmet puaka kan zirlaite an rawn um darh vak hnu khan Mizoram sawrkar chuan ramri chungchang ngawrh lehzuala buaipui turin Chief Secretary kaihhruaiin Core Committee a din tih a sawi a. Chumi hnuah sawrkar lo ding tharin Dy. Chief Minister Chairman na hnuaiah Boundary Committee dinin member te pawh a huamzau thei ang ber tura ngaih angin Political Party tin te leh NGO pawl lian te tel kim thei ang berin a din a ni, a ti a. Heng Committee ten ramri chinfelna atana lehkha pawimawh (document) lakkhawm leh an hna thawh tawh chin te sawiin, Mizoram sawrkar chuan a duh angin a tanhmun tur te tichiangin document te pawh a nei tha thawkhat tawh a ni, a ti a. Ramri buaina chungchangah Political Party leh NGO hrang hrang aiawha Boundary Committee a tel te pawh an lungrual tlang viau a, a tul anga inbiakna nei tura Mizoram sawrkar a inpeih tih a sawi bawk.

Home Minister chuan Ramri chingfel tur chuan pakhat duhdan ngawt a tlang thei lo tih pawh sawiin, “Lehlam lehlam inrem a ngaih avangin chinfel a awlai lova, India ram leh ram dang inrina buai te pawh hun rei tak buaipui hnuah pawh chinfel theih a ni rih lo,” a ti a. State ramri chingfel tur pawh hian Boundary Commission din te pawh awm mah se ramri chinfel tak tak hi chu a har an ti ve hle a ni, a ti bawk.

Nimin-a lehkhabu tlangzarhna hunah hian Home Minister chuan ramri buaina chung-changa document hlu tak tak lakhawma lehkhabu rintlak tak buatsaihtu Lalthuamliana hmalakna hlu a tih zia leh ramri veituten an chhawr tangkai hle a beisei thu a sawi bawk.

Mizoram leh Assam Ramri Buaina bu-ah hian mithiam hrang hrang te thuziak bakah hian document pawimawh tak tak dah tel a ni a. Lehkhabu tlangzarhnaah hian ramri chungchang sawihona hun hman nghal niin, Dr. Joseph K. Lalfakzuala, Asst. Professor, Govt. T. Romana College in sawihona hun a hawng a ni.

Comments

Popular News (Last 30 Days)

LPG man bithliah thar