Keitum khua ah hri leng ziaawm chho mek zel

Serchhip District chhunga Town area pawnlam-a COVID-19 hri kai hmuhchhuah tamna ber nia hriat Keitum khua chuan an khua ah hri leng in ziaawm lam a pan mek tih sawiin, hri kai enkawllai mi 18 an la nei mek tih an sawi.

Keitum khua hi nimin khan LENKAWL chuan a hmunah tlawhin hri leng chungchanga an dinhmun leh hma an lak dan te VLTF hruaitu ten an lo hrilh a, VLTF hruaitute chuan Keitum khua hi In 450 vel niin mihring 2300 dawn an awm tih an sawi a, an khua ah hian hri kai mi 314 hmuhchhuah a ni tawh tih sawiin, tunah hian enkawllai 18 chiah an awm tawh thu leh mi 13 te chu 4C-ah enkawl in mi 5 te chu In lama inenkawl an ni tih an sawi a, hri vanga boral mi pakhat an neih tawh thu leh hei erawh hi chu District danga hri kai hmuh-chhuah a nih thu an sawi bawk.

Keitum VLTF hruaitute chuan hri kai hmuhchhuah an tam avang hian 4C hmun thum-ah an siam thu leh pakhat pawh hman mai theih tura an ruahman thu an sawi a, amaherawh chu hri kai an tlakhniam ve zel avangin 4C pahnih chu titawpin tunah hian pakhat an la kalpui mek thu an sawi bawk.

4C-a an enkawl te hi a tir atangin ei leh in a thlawna an la inpek thu pawh VLTF hruaitute chuan sawiin, heng te hi mipui leh mi tlawmngai thawhkhawm bakah bialtu MLA in sumfai-a a pek te a ni tih a sawi a. Bialtu MLA leh Home Minister ni bawk Lalchamliana hian sumfai bakah bungrua te pek thu an sawi a. Hri kai te mamawh damdawi chu a hlawma VLTF ten lak sakin a mamawh ten an leichhawng ve leh tih an sawi a, hri kai te dinhmun hi Health Department atangin Doctor in a enpui reng thu leh kumin June thla atangin hlawh nei lova thawktu inpe mi pakhat neiin tun thlenga ala thawh thu a sawi bawk. Keitum khua ah hian inkharkhipna kalpui mek niin chawlhkar thum vel hei hi kalpui a ni tawh a, nimin atang khan ram lama hnathawk turte chu thawh phalsak an ni bawk.