Serchhip District-a zirna In hrang hrang te hawn chhunzawm dan tur sawihona neih a ni

COVID-19 hri leng avanga zirna In hawn mumal theih a nih loh hnuah Serchhip District-a Zirna In hawn chhunzawm dan tur chungchang ngaihtuahin nimin khan Serchhip District Disaster Management Authority chu an thukhawm a, Serchhip District-a hri leng dinhmun te thlir chungin tuna kaldan pangngai a la kal chhunzawm tura tih a ni.

Nimin-a Serchhip DC Meeting Hall-a Serchhip District Disaster Management Authority thutkhawm hi Bawrhsap mawhphurhna la mektu Addl. DC Lalmuansanga Ralte chuan kaihruaiin Mizoram State sawrkar in hri leng laka inkaihhruaina a siam ah inkhuahkhirhna ti tlem tial tialin phalna pek pawh a tam tial tial thu a sawi a, tuna kaihhruaina thar berah Board Exam tur pawl 10 leh 12 te chu School kal phal a nih tawh thu sawiin, hei bakah hian Govt. Serchhip College pawh Practical tih ngai te an neih avangin CAB zawm chunga an kal phalsak a ni tawh tih a sawi a, heng bak zirna In dang te kalpui dan tur chungchang ngaihtuaha he thutkhawm hi koh a ni tih a sawi bawk.

He hunah hian SDO (Sadar) C. Laltleipuii chuan Serchhip District-a zirna kalpui mek dan te sawiin, hri kai awmlohna khua ah te chuan School Management Committee ten dilna an siam a nih chuan zirna In hi hawn phalsak an nih thu leh hetiang bawk hian tunah pawh hri kai awm lohna khua ah te chuan kalpui chhunzawm tur a ni tih a sawi bawk.

Serchhip CMO Dr. Laldawngliana Sailo chuan hri leng chungchanga Serchhip District dinhmun tlangpui tarlangin, tunah hian hri kai enkawl zingah kum 18 hnuailam mi 196 an awm mek thu sawin, hei hi hri kai zawng zawng atangin zaa 37.4 a ni tih a sawi a, khaw thenkhat ah chuan hri kai zat hi tlahniam mah se New Serchhip, Thentlang, Chhiahtlang leh khaw thenkhat ah te chuan hri kai hi ala tlakhniam loh thu a sawi.

Serchhip CDPO Lalbiakliana pawhin Serchhip ICDS Project hnuaiah Hmuntha, Sialhau, Vanchengte, Thinglian, Hmunzawl, Neihloh, Buangpui leh Kanghmun South-ah te Anganwadi Centre hawn a ni tawh tih sawiin, amaherawh chu hri kai awmna khua ah te chuan khar leh a ni tawh tih an sawi a, Anganwadi hawn lohna khua ah te hian Nutrition chu semchhuah chhunzawm reng a ni tih sawiin, Pre-Education erawh duh anga kalpui theih a ni lo chungin a theih angin Online hmanga an kalpui ve thu a sawi bawk.

He thutkhawm ah hian School Education kaihhnawih sawrkar Department, tlawm-ngai pawl leh Serchhip leh Thenzawl-a Joint VC te bakah thuthar thehdarhtute sawm ni bawkin Serchhip District dinhmun hrang hrang te thlirin sawrkar in phalna a pek sa pawl 10 leh 12 te bakah Serchhip District-a Residential Institute pali (4), Horticulture College Thenzawl, JNV Thenzawl, Eklavya Model Residential School (EMRS) Serchhip leh Sainik School Chhing-chhip te chu CAB tha taka zawm chunga an zirna chhunzawm tir remtih sak an ni a. Residential School/Residential College-a lut turte chuan COVID-19 hri an vei lo a ni tih finfiahna, Negative Certificate tharlam emaw, School Education Department-in inkaihhruaina a siam emaw ang zelin School an luh hmain an nei ngei tur a ni a. Hemi tel lo hian School-ah luh ve rem lo ang.

A bak zirna dangte erawh chu COVID-19 hri awm lohna khua, an khawtlang hruaitu, VLTF leh School thuneituten inlungruala School kal chhunzawm tha an tiha DDMA ah dilna an thlen chuan ngaihtuah sak nise tha an ti tlang a, hei hi inkaihhruaina thar ber a rawn chhuah hmaa an kal dan pangngai kha niin heng dilna siam khua ah te hi chuan zirna In hawn phalna pek an ni. DDMA in School hawn phalna a pek khua ah te hian School Education Department in SOP a siam te chu tha taka zawm tur a ni ang.