Zirna hian mihringte hi mi puitling ah min siam a tum ber - Home Minister

Home Minister Lalchamliana chuan, “Zirna hian mihringte hi mi puitling ah min siam a tum ber a, pass that ni ngawt lovin mahni tan, khawtlang tan leh ram tana mi tangkai siam hi a tum a ni,” a ti.

Pachhunga University College in an zirlai naupang, Mizoram University Under-Graduate Examination 2021 a pass chhuak te lawmpuina hun nimin-a an College Auditorium-a neih a hmanpuina ah he thu hi sawiin Home Minister chuan Zirna hian hriatna leh thiamna min pe ngei a, chutih rualin zirna leh hriatna tihpun ni ngawt lovin, mahni puala khawvel hmachhawn thei tura min siamtu a ni tih hi kan hriat a ngai a ni, a ti a. Zirlai tan 'T' pathum a pawimawh hle tih pawh sawiin, “Chungte chu Tumruhna, Taimakna leh Thawhrimna te an ni a, thatlai huna hrehawm ti taka peihlo chunga lehkha zir hram hram hi a tawpah an hlawhtling a, an hahdam thin,” tiin zirlaite te chu a fuih a. Mizo zinga All India Services tling thei kan tlem chhan pawh hi 'T' pathum kan tlakchham tak vang hi a ni mai thei tih a sawi bawk.

Nimin-a he hun hmanna ah hian Zirlai pass chhuak zingah Arts Stream-a mark hmu sang ber Lalnunpuia Renthlei, Department of Political Science hnenah ‘H.K.Bawichhuaka Award’ hlan a ni a. Science Stream-a mark hmusang ber pahnih C.Laldinpuii, Department of Physics leh Millenium Vanlalpeka, Department of Zoology hnenah ‘Lenrual Hlui Award’ hlan an ni. Management leh Commerce Stream-a mark hmu sang ber Lalremsangpuia, Department of Commerce hnenah ‘Khawtinkhuma Award’hlan a ni bawk. Heng Award hian Certificate leh tangkafai Rs. 10000 a keng tel a ni.

MZU hnuaia Under-Graduate Examination 2021-ah khan Rank holder 233 an awm a, chung zinga 156 chu Pachhunga University College zirlaite an ni a, za zela 66.95 an hauh phak a ni. Rank holder zingah hian Topper 17, Second Rank 17, Third Rank Holder 17 bakah Rank Holder 105 an awm a. Heng zirlaite hi lawmpuina Certificate leh tangkafai pek niin Rank Holder te tan hian a vaiin Rs. 1,29,000/- zet semchhuah a ni.

Pachhunga University College-ah hian Principal Prof. H. Lalthanzara kaihhruaina hnuaiah Under-Graduate-ah Arts, Science, Commerce leh Management zirna awmin, Department 23-ah zirlai 3014 an awm a. Post Graduate department pali - Mizo, Philosophy, Life Sciences, Geophysics awmin zirlai 89 an awm mek a. Life Science Department-ah Ph.D zirlai 12 awmin PU College-ah hian zirlai 3103 an awm mek a ni. Heng bakah hian PUC faculty hnuaiah Ph.D zirlai 20 vel zet an awm bawk. Under graduate zirlai zingah hian ramdangmi (foreign students) pahnih an awm a, Mizoram-a Foreign Students nei thei awmchhun a ni.