Latest News

Chief Minister in East India Summit neih a hmanpui

Confederation of Indian Industries (CII) buatsaih East India Summit-2021 hman mekah nimin khan Mizoram State Session neih niin he hun hi Chief Minister Zoramthanga chuan a hmanpui a ni.

Biakhmuhtheihna hmanga he hun hman ah hian Chief Minister Zoramthanga chuan Investment ti duhte tan Mizoram chuan potential tam tak a neih thu leh sawrkar pawh a inhawn thu sawiin, Mizoram economy tihhmasawnna tura kawng hrang hrang a awm thu a sawi bawk a. Mizoram chu ram la hman tangkai theih tur zau tak, ruahtui duhthusam, sik leh sa nuam tak, thei leh thlai hrang hrang that theihna hmun a nih avangin Sector hrang hrangah hmasawnna a awm theih thu leh, sawrkar pawhin theihtawp a chhuah thu a sawi a. State tlawhpawh harsa tak a nihna chu thlak danglama, tlawhpawh awlsam taka siam theih a nih thu pawh sawiin, inkalpawhna chu ngaihpawimawh hmasak ber tur zing a mi a nih thu a sawi bawk.

Chief Secretary Lalnunmawia Chuaungo pawhin he hunah hian Mizoram-a investment ti duhte chu rawn zirchiang tura sawmin, investor leh state mipuite tana hamthatna turah chuan harsatna awm thei te pawh sutkian dan ngaihtuah pui turin sawrkar a inhawn thu a sawi a ni.

East India Summit-2021 hi East India leh North East India a State hrang hrang ten economy leh culture-a inkungkaihna nghet zawk an lo neih theih nana buatsaih a ni a. He hunah hian State thenkhatte Economic Sector hrang hranga an potential leh an tharchhuahte phochhuahna hun pek an ni a. East India Summit-2021-ah hian Ports, Railways, Aviation leh Future Mobility chu thlurbing a ni a. He East India Summit-2021 in a tum chu India hmar leh hmarchhak hmasawna hrang hrang awm thei te haichhuaha chumi ti hlawhtling theitu tur ram chhung leh ram pawna Agencies te dapchhuah a ni.

Comments

Chhiar Hlawhte