Tuirial bial-ah inthlan Campaign kalpui mek a ni

Tuirial bial-a Assembly bye-election neih tur atan Political party hrang hrang leh an Candidate te chuan ngawrh takin Campaign an nei mek.

He inthlanna neih tura Congress Candidate Chalrosanga Ralte chuan nimin khan Hortoki-ah mithar lawmlutin MNF sawrkar kan hrawn mekah Bill chi hrang hrang nasa taka tihsan a nih thu leh Mizoram mipui min tibuai takzet nia sawiin, “Electric bill hi nasa taka tihsan a ni satliah mai lo a, dik lo takin, sang uchuak takin COVID-19 behchhanin MNF sawrkarin mipuite min bill a. Thingtlang hmun hrang hranga kuthna-thawktu, a rethei ber thlengin min nghawng na hle a nih hi. Hei hian MNF sorkarin mipui dinhmun a ngaihtuah loh zia a tarlang chiang hle,” tiin sum leh pai enkawlna kawnga MNF sawrkar hlawhchham zia a tarlang chiang niin a sawi bawk.

ZPM Party pawhin nimin khan Khamrang-ah Campaign Office hawnna neiin he hunah hian an Candidate Laltlanmawia chuan kan ram awm mek dan siamtha thei leh siamtha ngam tur party awmchhun chu ZPM a ni tih sawiin, “Kan ram awm mek dan hi a tawk e, ti ringawt tur kan ni lo, kan ram hian a tha zawk kawng a zawh thei tih hi kan ring tlat tur a ni,” a ti. He hunah hian ZPM Working President K. Sapdanga pawhin Congress leh MNF ten kum 35 ro an inrel chhawk chhunga min hruaithlenna chu - India rama State thawhchhuah nei tlem ber, Power nei tlem ber, Kawng nei biboh ber, Cancer vei tam ber, HIV +ve tam ber leh tunah Covid hripui kai rate sanna ber nia sawiin, “Kan ram leh hnam chhan tur hian sum leh pai hausakna a ngai lo – Dikna, Rinawmna leh Huaisenna hi a tawk em em a ni,” a ti bawk.

MNF Party chuan niminpiah khan Kawnpui-ah Party Election Campaign Office hawnna neiin he hunah hian an Candidate K. Laldawngliana chuan Politics game verther chu a nunah a tel ve lo tih a sawi a, “Thil chu a nihna anga lanpui mai chi ka ni a. He bial hian bial dangte anga hmasawnna neih kan mamawh a. Chumi ti thei tur chuan bial mipuite hi thawhpuiah ka sawm che u a, he bial-ah hian awm tur awmlo a tam a. Tirawh u, ke i pen ho ang u,” a ti a. “Bial tan hian ruahmanna tam tak kan lo siam ve a. Thalaite, kawng hrang hranga an hmasawnna tur te, zirna leh zirna In te thuamthat a ngaihzia leh zirtirtu indaihlohna te hi hna hmasa ah neih tul ka ti a. Kuthnathawktute tana awmze nei zawka hmalak hi ka duh bawk a ni,” a ti.

Hetihlai hian BJP lam pawhin khaw hrang hrangah Campaign an nei chho mek bawk a, BJP hian khaw hrang hrangah Campaign Office an hawng ve lemlo nia thudawn niin an Candidate K. Laldinthara leh party hruaitu ten ngawrh takin campaign hi an kalpui mek a ni.