Hunpui-a halpuah leh halmawi khapna chungchanga mipui zirtir dan tur sawihona nei

Mizoram sawrkar-a Information & Public Relations Department-a Officer leh MJA General Hqrs. OB te chuan kumin hunpui vuakvet-a halpuah, halmawi, silailem mu nei chi leh Sky Lantern khapna chungchanga mipuite zirtir dan tur chungchang leh hemi kawnga hmalak dan tur nimin khan an sawiho.

He sawihna I&PR Director Lallianpuii hova a Pisa-a neih ah hian I&PR Director chuan sawrkarin hmalakna thar a neih changa mipuite zirtirna leh hrilfiahna kawnga MJA ten sawrkar tha taka an thawhopui thinna ah lawmthu sawiin, mipuite hmakhaw ngai tak chunga theihtawp an chhuah thin chu lawmawm a tih thu leh thawhhona tha pawh neih chhunzawm zel a tul thu a sawi a. Sawrkarin kumtin Halpuah leh Halmawi khapna a tichhuak thin a, kan zawm tha tawk lo emaw ni chu aw tih tur hian thil a awm thin a, tunah pawh hian nasa lehzuala tan kan lak a ngai a ni, a ti.

He hunah hian MJA President Zonunsanga Khiangte pawhin sawrkarin an chungah rinna a nghat thin chu lawmawm a tih thu sawiin, mipuite tana tha tur leh an himna tur zirtirna kawngah chuan theihtawp chhuahin tan an la ve reng dawn tih a sawi bawk.

He hunah hian hunpui lai-a Halpuah, Halmawi, Silailem mu nei chi leh Sky Lantern khapna chungchanga hmalak dan tur hrang hrang te sawiho niin supply awm lo tura a rang thei ang bera tun atanga chet lak a tul thu leh ramri luhka pawimawhah lirthei lo lut reng reng uluk taka enfiah leh Bazar a zawrh a awm leh awm loh enfiah tura Police hotute hnena ngenna siam te, MIMA hotute hnenah an memberte zingah hetiang sawrkarin a khap thil te hi Mizoram-a la lut lo tura hmala tura ngen te, kum hmasa lama he khapna bawhchhia sawrkarin a mante hrem an nih dan puanzar te a tul thu an sawi a, hremna hi a na tawk lo nge dan kenkawh that a ni lo zawk tihte pawh zirchian a tula hriat a ni bawk a. Sawrkarin kumtin khapna thupek a chhuah thin chungin tunhma lama tha taka zawm a nih hnuah tunhnai kum tlemte kalta atang khan kan zawm tha ta lo ni a lang chu hmalakna kawngah tan lak thar a ngai hle tih sawi a ni bawk.

Heng bakah hian kumtin halpuah leh halmawi halna hmun hi Veng tinah a tam ngai loh avangin Police lamin Mobile Team te siam a, hetiang hal a nihna hmun hi rang taka pan vat thin a that thu sawi a ni a, chanchinbu, TV leh Radio kaltlangin halpuah leh halmawi ten kawng hrang hranga mihring te harsatna a thlen dan uar lehzuala puan te, editorial leh article hmanga nasa lehzual zirtirna pekte a tha tih a ni a. Delhi sawrkar pawhin kumin July thla khan halpuah leh halmawi khap thupek a chhuah tawh thute pawh tarlan a ni bawk.