Latest News

Cricket Final khel dawn

Cricket Association of Serchhip District in an buatsaih, Serchhip District Cricket League vawi khatna chu Vawiin chhun dar 12:00 hian Final khelh a ni dawn ta a, Tuikhuah Veng CC leh AO3C ten Final hi an khel dawn a ni. He inkhel hi TV lamah en theih tura pekchhuah leh a ni dawn a ni. Vawiin a Final khelh hi Cricket Association of Mizoram hotute pawhin an rawn hmanpui dawn a ni.

Tuirial bial bye-election ah Candidate 4 awm; CEO in NGO te inbuatsaihna a hrilhfiah

Tun thla ni 30-a Tuirial bial Assembly bye-election neih turah Candidate pali (4) an awm dawn ta a, Mizoram Chief Electoral Officer (CEO) chuan nimin khan NGO hrang hrangte kawmin he inthlanna neih tur atana inbuatsaihna te a hrilhfiah.

Tun thla ni 30-a Tuirial Bial Assembly bye-election neih tur chuh tuma Nomination paper thehlut te tana inhnuhdawhna hun hawn chu nimin tlai dar 3:00 khan khar niin inhnuhdawh theihna hun hawn chhung hian inhnukdawk an awm lo a, hei vang hian he inthlanna chuh tur hian Candidate mi 4 an awm dawn ta a. Heng te hi BJP Candidate K. Laldinthara; INC Candidate Chalrosanga Ralte, MNF Candidate Laldawngliana leh ZPM Party Candidate Laltlanmawia te an ni.

Hetihlai hian Mizoram Chief Electoral Officer P.Jawahar IAS chuan nimin khan Mizoram a NGO hrang hrang aiawhte SAD Conference Hall-ah kawmin Tuirial bial bye-election atana inbuatsaihna kalpui nih mek dan leh Electoral Roll atanga Tripura Transit Camp-a khawsa mek Bru Voter-te hming paihchhuah chungchanga Election Commission of India nena an indawr dan te a tarlang a. Mizoram CEO chuan Mizoram Electoral Roll atanga Tripura Camp-a cheng mek Bru voter-te hming paihchhuah tura ngenna NGO leh political party hrang hrang atanga a dawn chu ECI hnenah thawn a nih tawh thu sawiin, ECI atangin chhanna nghah mek a ni tih a sawi a. ECI-in inthlan a puan tawh angin ECI Guidelines zawmin Election Department chuan inthlan awm tur atan inbuatsaihna a kalpui mek zel a, boruak muanawm hnuaiah inthlan felfai neih a nih ngei a beisei thu a sawi bawk.

He hunah hian CEO chuan September 28-a bye-election neih tur puan a nih atangin Model Code of Conduct chu hman tan nghal a ni tih sawiin, inthlan atana Campaign-na reng rengah Sakhuana emaw, Hnam bil thil thu hmangin thutiam emaw, thuchhuah emaw (promises/statements) siam tur a ni lo tih a tarlang bawk.

Comments

Chhiar Hlawhte