Ni zung chakna hmanga Bungtlang khaw tui lakna tur hlawhtling taka enchhin a ni

Jal Jeevan Mission (JJM) hnuaia Serchhip District chhunga Bungtlang khaw mipuite tana Tui lakna, E. Bungtlang Mini Solar Based Pipe Water Supply Scheme-a Solar Pumping System bik chu nimin khan hlawhtling taka enchhinna neih a ni.

India rama ni zung chakna hmanga tui pump chhuahna sâng ber tur, E. Bungtlang Mini Solar Based Pipe Water Supply Scheme enchhinna hi nimin khan PHE Department-a Engineer-in-Chief, C. Lalremsiama hovin E. Bungtlang Mini Solar Based WSS atana Solar Pump dahna, Darnam lui kam-a Pump House-ah neih a ni a, he hunah hian Er. C.Lalremsiama chuan khawl pakhat zawk tinungin, hlawhtling takin E. Bungtlang-a Main Reservoir-ah tui pump chhuah a ni a, hemi hnu hian Er. HC. Lalnunzira, CE, Zone-I chuan khawl pahnihna tinung ve lehin, hetah pawh hian hlawhtling takin tui a haw chhuak bawk a ni.

He hunah hian PHE Department hotute chuan contractor leh a enkawltute thil tul pawimawhte zawtin hmalak zel dan turte an hrilh nghal a, Er. C. Lalremsiama chuan Single Stage-a Mizoram-a nizung chakna hmanga Tui pump-na sang ber chu meter 270 a ni tih sawiin, tunah chuan meter 475-a sanga Solar hmanga hlawhtling taka Tui Pump chhuah a ni chu lawmawm a tih thu a sawi a, hetianga sanga ni zung chakna hmanga tui pump chhuahna hi khawvel ah a awm an la hriat loh thu a sawi bawk.

E. Bungtlang Mini Solar Based Pipe WSS hi P&V Eastern Engineers, Hunthar Veng, Aizawl chuan Rs. 445,27,267/-in an thawk a, February, 2021 atang khan thawk tanin, thla 16 chhunga zawhfel tura ruahman a ni na-in thla 8 chhung in an peihfel hman a. He Scheme-ah hian mipui 2648-te chu nitin mi pakhat tan tui litre 55 zel pe tura ruahman niin nitin-a an mamawh zat hi litre 146,000 a ni a, ni zung chakna hmang tui pump khawl hian Darnam lui atangin KM 2.5-a thui hmangin meter 475-a sanga awm Tuizem lian-ah darkar khatah tui litre 25,600 a pump chhuak thei a, nitin darkar 6-9 chhung tui pump hna thawk thei tura duan a ni a, tui pump khawl hi pahnih dah niin, pakhat hi a thlaveng atana dah a ni a, Solar Pump atan hian Solar plate, 956 x 1956mm-a hlai, plate 315 bunfel tawh a ni a, Solar Power Plant hi 1x103.9 kWp niin Pump hi 59 kW a ni.

Tunah hian chhungkaw 434 te tui connection (FHTC) pek hna thawh mek niin Anganwadi Centre 7, School 10 bakah VC House leh Health Sub-Centre-te chu FHTC pek vek tawh an ni a, Solar pump atana Darnam lui tui pump chhuah a nih bakah an khua-in Gravity hmanga tuilak an neih sa, Chawngtleng leh Khawnglung atangin tui lak tel zel ala ni bawk a. He Scheme hnuaia mi, Tuizem lian pathum te, Duty room te, Security Fencing siam hnate zawh tawh niin, khaw chhunga tui sem kualna tur leh chhungtin tui connection pekna tur Pipe line te buaipui mek a ni.