Chanchin thar thenkhat :

Mamit DISHA thukhawm

Mamit District Development Coordination and Monitoring Committee (DISHA) thutkhawm chu nimin khan biakhmuhtheihna hmangin neih a ni a, he hun hi Chairman Lok Sabha MP C. Lalrosanga leh Co-Chairman Rajya Sabha MP K. Vanlalvena te chuan New Delhi atanga kai-hruaiin Mamit District chhunga Central sawrkar Scheme hrang hrang hman dante thlirho a ni a, Aspirational District a nihna anga Mamit District chhunga hmalak dante an sawiho bawk. He thut-khawm ah hian Mamit DC Dr. Lalrozama leh Mamit bialtu MLA, Er. H. Lalzirliana bakah sawrkar Department aiawhte an tel a ni.

AMC in LC fai lawmman sem

India ram zalenna kum 75 tlin lawmna, Azadi Ka Amrit Mahotsav kal zel puala Aizawl Municipal Corporation (AMC) in Aizawl khawpui chhunga Veng fai thlanna a buatsaih a titha te hnena lawmman semna chu nimin khan AMC Auditorium, Aizawl-ah neih a ni a, Luangmual Local Council chuan lawmman pakhatna dawngin Govt. Complex Local Council leh Model Veng Local Council ten an dawt a, heng lawmman te hi Aizawl Mayor Lalrinenga Sailo chuan a sem a ni. Vawiin hian Aizawl Local Council zinga bawlhhlawh thliar hrang (Source Segregation) tha ber result puanna leh Sanitation Worker te chawimawina hun hman leh a ni ang.

Hri leng dinhmun thlirho

Mizoram-a COVID-19 hri leng mek din-hmun thlirin nimin khan Health Minister Dr. R. Lalthangliana hovin mi pawimawh te chu SAD Conference Hall-ah an thukhawm a, he hunah hian inchhungkhur-a kum upate leh natna ben-vawn nei chenpuituten fimkhur lehzuala an venpui a tul thu tarlan niin, Khum bet-a na leh tar chaklo, pawn chhuak thei tawh lote hri danna pek dan tur ruahmanna siam mek a nih thu leh District tinah Survey neih a nih thu tarlan a ni a. Ramri kan-a raltlan lo, lutte pawh a theih ang anga umzui a, vaccine pek an nih thu tarlan a ni bawk.

Disconnect tum pawi ti

BJP Mizoram Pradesh Thalai Hqrs. chuan Mizoram Sawrkar in Electric Bill pe thei lo te Disconnect sak a tum chu pawi an tih thu thuchhuah siama tarlangin, Covid hripui leng vangin Sawrkar in mipui inkharkhip puanga inhlawhfa chawp leh eichawp zawng tan hnathawh hleihtheih a nih loh laia hetiang thil tih chu mipui harsatna pakhat mah hrelo sawrkar kan hrawn tih a langchiang niin an sawi.

E. Roll atanga paih ngen

PC Party chuan Tripura-a Bru awm nghet tawh, Mizoram-a Vote la neite chungchanga Election Commission of India-a ngenna an neih chu Mizoram Joint CEO David Liansanglura Pachuau hnenah an thlen a, Tripura-a Bru awm nghet tawh, Mizoram a Vote la neite te chu Tuirial bial MLA bye-election neih hma ngeia Electorol Roll atanga an hming paih turin an ngen a ni.