Latest News

Mizoram-ah Hri kai mi nuai khat aiin an tam ta

Mizoram-a COVID-19 hri kai hmuhchhuah chu mi nuai khat aiin an tam ta.

Niminpiah khan Mizoram-ah Sample 9755 enfiah leh niin heng atang hian hri kai 1471 hmuhchhuah leh an ni a, ZMC-a RT-PCR Laboratory-ah Sample 1203 enfiah niin heng atang hian hri kai mi 371 hmuhchhuah niin Fluorescent Immunoassay (FIA) Test hmanga  Sample 171 enfiah atangin hri kai mi 41 hmuh an ni bawk a. District hrang hranga TrueNat Laboratory-ah Sample 548 enfiah niin hri kai mi 100 hmuh an nih bakah Rapid Antigen Test hmanga Sample enfiah 7655-ah hri kai mi 959 hmuh an ni bawk.

Mizoram-a COVID-19 hri kai enkawl zingah nimin khan tlai dar 5:00 thlengin mi 938 te chu enkawl dam niin anmahni enkawlna hmun atanga chhuahtir an ni ve leh bawk a. Heti hian nimin tlai dar 5:00 thleng khan Mizoram-a hri kai hmuhchhuah chu 101,327 niin heng zinga 85,925 te chu enkawl dam an ni tawh a, hei hi hri kai hmuhchhuah atanga chhutin za zela 84.80 a ni a, hri kai enkawllai 15,006 an la awm a ni. Nimin khan hri kai zingah nunna chan mi pathum chhinchhiah belh leh niin nimin tlai thlengin hri kai zingah mi 336 an boral tawh bawk a ni.

Comments

Popular News (Last 30 Days)