Sailutar-a rawngbawltu James-a Police ten an man

Hun engemaw chen Sailutar khua-a rawng-bawl-a awm James Lalramliana chu hmeichhe kumtling lo laka mipat hmeichhiatna hmang lui-a puh a nih avangin Sailutar khua atanga hnawhchhuah niin nimin Darlawn Police ten Aizawl-ah an man.

Thudawn danin James Lalramliana hi hun engemaw chen atang khan Sailutar-ah hian rawngbawlna chhuanlamin a awm tawh a, tun thla ni 3 khan Sailutar khua-a hmeichhe tleirawl te Pathian thu-a inpawlhona neih ah kum 14-a upa hmeichhe pakhat chuan James-a hian a mutpui thin thu leh zu a inpui thin nia sawiin, hemi kal zelah hian tunkar Thawhlehni zan dar 9:00 vel khan Sailutar khua atang hian VC te chuan an hnawtchhuak a. He Hmeichhe chhungte hian Darlawn Police Station-ah FIR thehlutin Darlawn Police te hi nimin khan Aizawl lamah he hmeichhia hi hruaia kal nghalin James Lalremliana hi thu zawhfiah turin an man nghal a ni.

Thudawn danin Sailutar khua ah hian James Lalramliana hi hun engemaw chen awm tawhin Kohhran Sunday School-ah a awm reng reng thin a, September thla atang khan midang finain, a riahna hmunah rawngbawlna chhuan-lamin hmeichhe thenkhat chu a riak turin a thlang thin nia sawi a ni bawk. Hetianga kumtling lo laka mipat hmeichhiatna lama hmingchhiatna a neih takah chuan Sailutar khawtlang chuan, VC huaihawtna in Sailutar khua rap tawh lo turin an khua atang hian an hnawtchhuak a ni.