Chanchin thar thenkhat :

Dy. Speaker hovin thukhawm

Mizoram Legislative Assembly Golden Jubilee Souvenir Sub-Committee chu nimin khan an Chairman leh Assembly Deputy Speaker Er. Lalrinawma hovin Mizoram Legislative Assembly Secretariat, Committee Room-ah an thukhawm a, he hunah hian nakum, May 10, 2022-a Mizo-ram Legislative Assembly kum 50-na lo thleng tur lawmna tura Souvenir buatsaih te, Jubilee lungphun leh Exhibition buatsaih dan tur an rel bakah rampum huapa Jubilee Logo insiam siak chungchangte an rel a ni.

Tlabung-ah DC in hawng

Cheng nuai 2 vel senga Tlabung Licheng Indoor Hall-a Badminton Carpet phah thar chu nimin khan Corporate Social Responsibility (CSR) sum hmanga he hna thawhna tur ngaihtuah saktu Lunglei DC Kulothungan A chuan a hawng a. Tlabung chu hmun kilkhawr zawka awm ni mah se, kawng hrang hranga hma an sawn theih nan theihtawp a chhuah zel dawn tih sawiin, CSR Fund atangin Ambulance lei fel tawh a nih thu leh a enkawltu turte kutah hlan thuai a nih a beisei thu a sawi bawk. Tlabung Licheng Indoor Hall-a Badminton Carpet phah tak leina atan hian Lunglei DC hian SRK Construction atangin CSR Fund hi a dilchhuah sak a ni.

Kawng siamin hnatlang nei

Aizawl lam atanga Mami panna kawngpui National Highway 44A Dapchhuah leh Dampui khaw hnuai inkar kawng chhia, ruahsur vanga kawng nal leh kawng khuar lutuk te hnawh khatin nimin khan Mamit District chhunga lirthei-a eizawng pawl hrang hrangte chu an hnatlang a, he hnatlang ah hian mi 50 vel thawkchhuakin helai kawng chhia avang hian harsatna nasa tak an tawh thin thu an sawi a ni.

MPF in mipui leh Party ngen

MPF chuan Tuirial bial by-election neih turah inthlanna zalen leh thianghlim a awm ngei theih nan Party tin leh mipuite therhlo leh dawt hmanga inbei lo turin an ngen tih an sawi.

Anthurial Festival hman tum

Tourism Minister Robert Romawia Royte hova sawrkar mi pawimawh te nimin-a a Pisa-a thukhawm chuan kumin-a Virtual Anthurium Festival hman dan tur relin, Covid Appropriate Behaviour (CAB) leh Sawrkar Inkaihhruaina dangte zawm chungin Anthurium Festival chu Aizawl Vanapa Hall-ah October ni 28 leh 29 hian neih ni se an ti a, Cable TV leh Social Media platform hrang hrang - facebook, youtube leh a dangte ah mipui thlir theih turin live in pekchhuah a ni ang.

SAGY zirhona neih leh a ni

Serchhip District chhunga North Mual-cheng khua chu Sansad Adarsh Gram Yojana (SAGY) hnuaia Model Village atana hawn a nih hnuah nimin khan SAGY Model Village chung-chang zirhona chu Mualcheng khawtlang hruaitute tan Mualcheng Community Hall-ah neih leh a ni a, he hunah hian DPRC Serchhip-a Head Faculty Vanlalhruaia leh a thawhpuiten SAGY nih-phung leh Participatory Rural Appraisal chungchang bakah thil pawimawh te an zirtir a ni.

SP hovin thutkhawm nei

Nimin khan Hnahthial-ah District Level Wildlife Crime Control Sub-Unit chu District SP, Lalbiakkila hovin a Pisa-ah an thukhawm a, he hunah hian hmalakna leh hmalak zel dan tur te thlirin, National Wildlife Protection Week 2021 pualin Hnahthial khawpui kawtchhuah ah tun thla ni 8 hian duty nise an ti.