Latest News

Cricket Final khel dawn

Cricket Association of Serchhip District in an buatsaih, Serchhip District Cricket League vawi khatna chu Vawiin chhun dar 12:00 hian Final khelh a ni dawn ta a, Tuikhuah Veng CC leh AO3C ten Final hi an khel dawn a ni. He inkhel hi TV lamah en theih tura pekchhuah leh a ni dawn a ni. Vawiin a Final khelh hi Cricket Association of Mizoram hotute pawhin an rawn hmanpui dawn a ni.

DoNER Minister hnenah Mizoram mamawh thlen

New Delhi-a cham mek Mizoram Rajya Sabha MP K. Vanlalvena leh OSD to Chief Minister Rosangzuala te chuan Union Minister of State for DoNER BL.Verma chu hmuin Mizoram tana thil pawimawh hrang hrang an thlen.

Rajya Sabha MP leh OSD to Chief Minister te hian niminpiah tlai khan DoNER Minister hi a chenna In-ah hmuin Lawngtlai to Paletwa kawng laih mekah Myanmar ram chhunga harsatna awm chungchang thlenin hemi chungchanga Chief Minister Zoramthanga hma a lo lak tawh dan te an tarlang a. He kawngpui hi Mizoram tan chauh ni lovin, India sawrkar Act East policy tih hlawhtlinna tur leh ram venhimna chungchang atana thil pawimawh tak a nih avangin harsatna hi sutkian thuai a tul thu thlenin, Mizoram-a Myanmar raltlan awm mek te chu Central sawrkarin tun aia nasa zawka a ngaihtuah a tul thu an thlen bawk.

Mizoram Rajya Sabha MP leh OSD te chuan Aizawl khawpuiah Convention Centre siam ngei a tul thu leh chumi atana ruahmanna awm mek pawh DONER Minister hnenah hian an thlen bawk a. DoNER Minister chuan October thla ah Mizoram-a lo zin a duh thu leh a tul ang apiang chu Mizoram Chief Minister nena sawidun a inhuam thu Mizoram aiawha amah dawrtute hi a lo hrilh a ni.

Comments

Chhiar Hlawhte