Latest News

COVID-19 hri kai hmuhchhuah an la pung zel

Mizoram-ah COVID-19 hri kai hmuhchhuah an la pung zel a, niminpiah khan Sample enfiah 6950 atangin hri kai mi 1170 hmuh belh leh niin Sample enfiah atanga za zela 16.83 te chuan hri an kai leh a ni.

ZMC-a RT-PCR Laboratory-ah niminpiah khan Sample 1583 enfiah niin hri kai mi 289 hmuh an ni a, an vai hian Aizawl District-a hri kai hmuhchhuah te niin Veng leh khua 59 ami te an ni. Aizawl-ah hian Fluorescent Immunoassay Test hmangin Sample 227 enfiah ni bawkin hri kai mi 23 hmuh an ni bawk a, an vai hian Aizawl khawpui chhung ami an ni bawk.

District hrang hranga TrueNat Laboratory-ah Sample 340 enfiah ni bawkin hri kai mi 59 hmuh an ni a, an zinga 15 te chu Kolasib District ami te niin Lawngtlai District-ah 10, Champhai leh Serchhip District-ah 9 ve ve, Lunglei District-ah 8, Khawzawl District-ah 4, Mamit District-ah 2 leh Aizawl leh Siaha District-ah mi pakhat ve ve an ni.

Rapid Antigen Test hmangin niminpiah khan Sample 4800 enfiah ni bawkin heng atang hian hri kai 799 hmuh an ni bawk a. An zinga 455 te chu Aizawl District atanga hri kai hmuhchhuah niin Lunglei District-ah 87, Champhai District-ah 86, Serchhip District-ah 51, Siaha District-ah 44, Lawngtlai District-ah 34, Mamit District-ah 17, Kolasib District-ah 13, Hnahthial District-ah 10 leh Khawzawl leh Saitual District-ah hri kai mi pakhat ve ve hmuh an ni bawk.

Nimin khan tlai dar 5:00 thlengin hri kai mi 729 te chu enkawl dam an ni leh a, heti hian Mizoram-a hri kai hmuhchhuah chu 94,830 niin an zinga 78,833, hri kai atanga zaa 83.13 te chu enkawl dam ni tawhin hri kai enkawllai 15,684 an la awm mek a ni.

COVID-19 hri kai zingah mi 314 boral tawh :

Mizoram-a COVID-19 hri kai zingah boral awm belh zelin nimin tlai thleng khan mi 314 zet an boral tawh. Chhinchhiahna atanga a lan danin niminpiah, September 30, 2021 khan Mizoram-a hri kai zingah mi 4 boral awmin zing dar 5:15-ah Zakamlovi (90), Chanmari Aizawl chu boralin zing dar 10:35-ah Punsangdi Dangmei (43), CRPF, Zemabawk a awm mek chu a boral ve leh a, chawhnu dar 1:40-ah Lalchhandami (62), Muanna Veng Aizawl chu a boral ve leh bakah P. Vanlalruata (52), Hunthar Veng chu zan dar 10:15-ah a boral ve leh bawk a ni. Heti hian September thla ah khan Mizoram-a hri kai zingah mi 93 zet boral an awm a, nitin hri kai boral awmin Mizoram-a hri kai boral an tam ber thla a nih bakah September 23 khan hri kai mi 10 zet boral awmin ni khat-a hri kai boral an tam ber tum a ni. Nimin tlai dar 4:20 khan Bawihchhungi (90), Tuikual North chu boralin chawhnu dar 3:15 khan Ngulsangvela (64), Ramhlun North, tlai dar 3:30-ah C. Lalruata (67), Hrangchalkawn, Lunglei leh dar 5:10-ah RL. Thangseia (65), West Phaileng te an boral bawk a ni.

Comments

Chhiar Hlawhte