Bru te paih turin ECI-ah thlen a ni tawh

Mizoram Chief Electoral Officer (CEO) P. Jawahar IAS chuan Bru voter, Tripura-a letleh ta, Mizorama Electoral Roll a la chuangte chu Roll atanga paih vek an nih theih nan ECI-ah thlen a nih tawh thu a sawi.

Tuirial Bial Assembly bye-election neih tura inbuatsaihna te thlirin nimin khan Mizoram CEO P. Jawahar hian Lungdai, Serkhan, Hortoki, Kawnpui leh Thingdawl-a Polling Station-te endikin Kolasib-a Counting Hall leh Strong Room buatsaih dan te pawh a hmunah a en nghal a. Kolasib DC Conference Hall-ah Political Party hrang hrang leh NGO aiawhte bakah Election Official-te kawmin Bru voter Tripura-a letleh ta, Mizoram-a Electoral Roll a la chuangte chu Roll atanga paih vek an nih theih nan Mizoram chhunga Political Party leh NGO hrang hrang atanga ngaihdan lakkhawmte nen ECI-ah thlen a nih tawh thu hi a sawi a. Kolasib Sub-Hqrs. YMA hruaitute chuan Polling Station pangngai ni lova a bik a Special Polling Booth ang chi a Bru-te vote thlakna tur siam anih chuan an dodal tur thu a sawi a, Political Party hrang hrang aiawh te pawhin an thlawp thu an sawi ve bawk a ni.

CEO chuan hrileng kar a inthlanna kalpui tur a nih angin Candidate-te chu COVID-19 vaccine (Full dose) la an ni lo a nih chuan RT-PCR Test Negative an nih a tul thu a sawi a. Vote thlak tur te hnenah kutkawr sem tur a nih thu leh vote thlak ni-a darkar hnuhnung ber, dar 5:00 PM leh dar 6:00 PM inkar chu hri kaite vote thlak hun atan a ruahman tur a nih thu sawiin, hri kai vote thlak tur an awmin Polling Station-a duty zawng zawng ten PPE hak vek tur a nih thu a sawi bawk.