MSU-in Staff Nurse lak cancel turin CM-ah an thlen; ZPM Thalai ten Nurse lakna lehkha copy an hal

Mizo Students’ Union (MSU) chuan tunhnaia Contract basis-a Staff Nurse post 50 lakah thil fello a awm avangin cancel leh turin Chief Minister hnenah an thlen a. ZPM Thalai Hqrs. chuan ZMC-a Staff Nurse 50 lâk dàn duhlohna lantîr nân Staff Nurse lâkna lehkha chu nimin khan an hal bawk.

MSU General Hqrs. hian Health & Medical Education Department hnuaia Contract basis-a Staff Nurse post 50 lakah thil fello a awm avangin tun thla ni 4-a result tih chhuah chu cancel turin Chief Minister hnenah an thlen tih nimin khan thuchhuah siama tarlangin, Staff Nurse 50 lâkah interview kaltlang lova lâk an awm avang leh mahni nunna thâpa inpe Volunteer-te duhsakna a awm loh avangin result hi cancel a tun thla ni 14 hmaa siamthat an phut thu an sawi a. Hripui dona kawnga sawrkarin Volunteer a koh lai a, mahni nunna pawh pawisa lova tlawmngaihna nena inpe Mizo thalai rualte’n sawrkar hna laka duhsakna an dawng leh lo chu awm lo an tih thu leh hna lakna kawnga hmalatute an dem thu pawh sawiin, he result-a tling volunteer ni ve lote chu in-resign leh vek turin an ngen bawk. Hei bakah hian MSU chuan Sawrkarin volunteer-te hlawh a pek tur sanction awm loh chhuanlama thla hnih a pek tawh loh pawh tun thla ni 14 ralhmaa pe fel tura an phut thu an sawi bawk.

Hetihlai hian ZPM Thalai Hqrs. chuan ZMC-a Staff Nurse 50 lâk dàn duhlohna lantîr nân Staff Nurse lâkna lehkha chu nimin khan Aizawl-a ZPM Office kawt-ah an hal a, he hunah hian ZPM Thalai Sr. Vice President, Dr. C. Lalrammawia chuan COVID-19 hripuiin Mizo-ram min rawn nuai tan atangin hripui do tura a hmatawnga thawk tura nunna thap-a inpe, Medical Volunteer-te Staff nurse lakna ah hnuchhawn an ni chu mak a tih thu sawiin, Nurse 50 lakna hnûkkîr tura ngenna lehkha hi Chief Minister, Health Minister leh MOT Chairman hnenah an thehluh tur thu a sawi bawk.

PC Party pawhin nimin khan thuchhuah siamin ZMC-a thawk tur Staff Nurse lak chung-chang ah thil felhlel tak awm ni a lang chu a rang thei ang bera chhui chiang turin Health Minister Dr. R. Lalthangliana an phut thu an sawi bawk.