Latest News

Ramri buai chinfel kawngah PM inrawlh turin ngen

India hmarchhak State hrang hranga Congress Thalaite chuan India hmarchhaka State ramri buaina chinfelna kawnga awmze nei zawka inrawlh thuai turin Prime Minister chu an ngen.

Nimin-a Prime Minister hnena Mizoram, Arunachal Pradesh, Manipur, Meghalaya, Nagaland leh Tripura Congress Thalai ten lehkha an thehluh ah tunhnaiaa vanduai-thlak taka Mizoram chhunga Assam Police leh Mizoram Police inkara buaina thleng te, Assam State leh a thenawm Meghalaya leh Nagaland inkara tunhnaia ramri-a buaina thlengte bakah hun rei tak chhung Assam-in hmarchhak State Mizoram, Meghalaya, Nagaland leh Arunachal Pradesh te nen ramri buai an lo neih tawhte thlirin Prime Minister's Office (PMO) leh Ministry of Home Affairs (MHA)-te chu heng ramri buai chinfel hna hi a ngaih pawimawh bera dah turin an ngen tih an tarlang a.

India hmarchhak mipuite chanchin, ram leh hnam nunphung dangdai leh pawimawh tak hi ramri chinfel kawngah hian ngaihthah chi a ni lo tih pawh tarlangin, hun rei lote chhung inremna hian awmzia a neih thui loh avangin, hmarchhak-a remna leh muanna a awm theih nan ramri buai hi chinfel a ngai a ni, an ti a. “Hmarchhak nunphung, hnam zia rang leh hmakhawsang atanga an chanchinte vawnhim a pawimawhna te hre renga rang taka awmze thui zawk nei tura in inrawlh hun kan lo thlir reng a ni,” tiin Hmarchhak-a remna leh muanna tluantling a awm theih nan North Eastern Regions (Reorganisation) Act, 1971 hi ngun thluk leh kimchang zawkin a kaihhnawih zawng zawngte nen zirchian lehzual a ngai tih Prime Minister hnenah hian an thlen bawk.

Comments

Chhiar Hlawhte