Mipui ten inkaihhruaina Dan an zawm that loh chuan khauh zawka inkhuahkhirh leh tum a ni

Serchhip District Bawrhsap, Kumar Abhishek IAS chuan COVID-19 hri leng mek laka himna tura inkaihhruaina Dan siam te mipui ten an zawm that loh chuan Total Lockdown emaw, inkaihhruaina khauh zawk emaw siam a nih leh tur thu a sawi.

Nimin chhun khan Serchhip District Bawrhsap, Kumar Abhishek ho hian Serchhip DC Office-a Officer te leh Police hotute bakah Serchhip khawpui lunlai-a VLTF Member te chuan hri leng avanga inkhuahkhirhna kalpui mek chungchang chu Serchhip DC Meeting Hall-ah an sawiho a. He sawihona hunah hian District Level Task Force on COVID-19 Chairman ni bawk, Kumar Abhishek chuan mipuiten thu kan awih tlan avangin Serchhip District chu hri leng mekah dinhmun tha takah kan awm mek tih sawiin, tuna hri kai enkawllai mi 55 awm zingah mi 40 vel chu Thenzawl-a enkawl niin midang zawng te hi BSF Sipai leh inkhunghrang lai te an ni tih a sawi a. Amaherawh chu mipui punkhawm tamna Bazar leh a chhehvelah COVID-19 laka himna dan, Covid Appropriate Behaviour (CAB) zawm kawngah kan inthlahdah ta hle nia a lan thu sawiin, “Heng himna Dan te hi hetiang zela kan hnualsuat chuan Total Lockdown emaw, Dawr hawn phalloh emaw, inkhuahkhirhna khauh zawk siam thar leh a ni ang,” a ti a ni.

Bawrhsap chuan hri leng laka kan himna tur Dan te tha taka kan zawma, mipuiten thu kan awih chuan Vawiin-a kan awm dan anga boruak nuam tak neih zui zel chu thil tha ber a ni tih sawiin, amaherawh chu himna Dan laka inthlahdahte avanga nikhat thilthua dinhmun thalo taka lut thut thei kan nih avangin himna dan (CAB) te hi tumah in kan hlamchhiah a thiang rih lo a ni, a ti a. “Mipuiten tha takin zawm zel ila, Executive Duty leh VLTF ten theihtawp la chhuah hram hram zel ila, vaccine tha takin la vek bawk ila, tichuan him takin, muanawm takin kan awm thei dawn a. Chu dinhmun nei tur chuan mitin in mawh kan phur a ni,” a ti.

He thutkhawm ah hian tuna kan dinhmun hrang hrangte sawiho niin mipuiten himna Dan an zawm leh zawmloh khauh zawka endik thar leh a rel a, a bikin Bazar leh dawr hmunte uluk lehzuala endik nise an ti a. Dawr khar hunbi-a kharlo te chu chawitir leh a hrem belh nan Hapta khat (1) chhung hawn tir phalloh an rel a, hemi kawngah hian Police te pawhin VLTF te hma lo lakpui an tum thu an sawi a. Phal chin baka infiamna practise te pawh chawi tir bakah an infiamna hmun Hapta khat khar tir nise an ti bawk. Mipuiten himna dan (Covid Appropriate Behaviour) tha takin zawm theuh se tih chu an thupui ber tur a nih thu he hunah hian tarlan a ni bawk.