Assam mi te laka FIR thehluh chu sut leh a ni

Chief Minister Zoramthanga chuan nimin khan Twitter kaltlangin Mizoram leh Assam inrem theih nan leh mipuite thlamuang zawka an awm theih nan Vairengte Police Station-a Assam mi te laka July 26-a FIR an thehluh chu an sut leh tih a sawi.

Mizoram - Assam ramri buaina avang hian July 26 khan Vairengte Police Station-ah thubuai ziahluh a ni a, he thubuai ziahluh a dan bawhchhia a puh Assam IGP Anurag Agarwal, DIG Devojyoti Mukherjee, Cachar District Bawrhsap Keerthi Jalli, Cachar DFO Sunnydeo Chaudhary, Cachar District SP Chandrakant Nimbalkar leh Dholai Police Station OC Sahab Uddin te chu nimin khan he thubuai chhuitu SDPO hma a inlan tura koh an ni tih lo hriattir turin Assam Chief Secretary leh DGP te hrilh an ni a. Assam Chief Minister leh Assam Police mi 200-te chu he thubuai ziahluh hmanga dan bawhchhia a puh tel an ni na-in Vairengte Police Station-a inlan tura koh zingah hi chuan an tel ve rih lo a. Thubuai siamsak zinga a rip zualte chu tualthah tuma puhna leh dan bawhchhe tura a huhova phhiarrukna te a ni.

Assam Chief Minister Himanta Biswas Sarma chuan niminpiah khan Twitter kaltlangin Mizoram nen inrem taka awm a duh thu sawiin, Mizoram Rajya Sabha MP, K.Vanlalvena laka Assam Police in FIR an siam pawh hnuk kir tura a hrilh thu a tarlang bawk a. Kolasib DC leh Vairengte SDPO laka FIR thehluh pawh hnuhkir a nih tur thu a sawi bawk.