Sample enfiah atanga zaa 36.13 in hri an kai

Pathianni khan Mizoram-ah Sample 1212 enfiah niin COVID-19 hri kai mi 438 hmuhchhuah an ni a, hri kai hmuhchhuah zat hi tlem deuh mah se Sample enfiah atanga chhut chuan za zela 36.13 zetin hri an kai a ni.

Pathianni khan ZMC-a RT-PCR Laboratory chu khar niin Sample enfiah a awm lova, District hrang hranga TrueNat Laboratory-ah Sample 110 enfiah niin hri kai mi 13 hmuhchhuah an ni a, an vai hian Mamit District-a hri kai hmuhchhuah vek niin an zinga mi 12 te chu Kolalian khua ami te an ni a, midang pakhat hi Dapchhuah khua niin hri kai tawh nen inkawmhnaihna nei vek an ni.

Pathianni khan Rapid Antigen Test hmangin Sample 1102 enfiah ni bawkin heng atang hian hri kai mi 425 hmuhchhuah an ni a, an zinga mi 290 te chu Aizawl District ami niin hri kai hmuhchhuah tamna ber Zemabawk North-ah hri kai 31 hmuhchhuah an ni a, hri kai mi 10 leh a aia tam hmuhna Veng leh khua 9 a awm bawk. Kolasib District-ah hri kai mi 70 hmuh niin Veng leh khua 21 ami an ni a, Lunglei District-ah hri kai mi 37 hmuh ni bawkin an zinga mi 32 zet chu Dawn khua ami an ni. Heng bakah hian Lawngtlai District-ah hri kai mi 17 hmuh ni bawkin Mamit District-ah 8 leh Serchhip District-ah hri kai mi 3 hmuh an ni bawk.

Heti hian nimin thlenga Mizoram-a COVID-19 hri kai hmuh tawh chu 39,363 niin nimin khan mi 347 te chu enkawl dam leh an ni a, heti hian nimin thlenga hri kai enkawl dam chu mi 27,371 ni tawhin hri kai hmuhchhuah atanga chhutin za zela 69.53 an ni a, tunah hian hri kai enkawllai 11,841 an la awm a ni.

Nimin khan Mizoram-ah COVID-19 hri kai mi pakhat boral awm lehin nimin chawhnu dar 3:05 khan Lalramliana (68), Venghlui Aizawl chu ZMC-ah a boral leh a, heti hian Mizoram-a hri kai zingah mi 151 an boral tawh a ni.