ZMC-a damlo te tan Oxygen man chawi ngai dawn

Zoram Medical College (ZMC)-ah damlo awm te chu Oxygen hman man chawitir an ni tawh dawn.

Nimin khan Dr. HC. Laldina, Medical Superintendent, SRH chuan Office Order tichhuakin, tun dinhmun ah rampum leh State-ah Oxygen mamawhna a nasat avang leh indaihlohna a pun zel vangte, Oxygen man atan pawh sum tam tak sen a ngaih mek avangin tun atanga thu leh awm hma chuan Oxygen hman man lak a nih tur thu a tarlang a. Oxygen hman man bithliah a nih dan chuan, COVID-19 hri veilo tan darkar khatah Rs. 30 bituk a ni a. COVID-19 hri kai tan ni khat-a litre 5-a chaka herh haw a nihin darkar khatah Rs. 50 leh ni khata litre 5 atanga 12-a chaka herh haw a nihin darkar khatah Rs. 120 chawi a ngai tawh dawn a. HFNC/Ventilator hi darkar khatah Rs. 120 chawi a ngai tawh dawn bawk a ni.

ZMC Director, Dr. John Zohminga chuan, tun hma zawngin ZMC ICU-ah hian Oxygen hman man hi chawitir a nih ngai loh thu a sawi a. Tun dinhmunah Oxygen mamawhna a san avang leh tlakchham palh theih a hlauhawmzia te ngaihtuahin Oxygen hman man hi lak ve tawh tura sawrkara thuneitu sang lamin an sawiho hnua he ruahmanna hi kalpui a nih thu a sawi a. “Oxygen mamawhna a sang tan a, ZMC-ah hian zan khat ah Oxygen bur lian 50 te, ni khatah 120 te hman chang a awm,” a ti.

ZMC-ah hian Oxygen dinhmun a that thu leh a thlaphanawm loh thu pawh sawiin Dr. John Zohminga chuan, Sawrkarin tualchhunga Oxygen Plant pathum hnen atangin Jumbo Oxygen Cylinder bur ruak thun khat leh zung zung thei turin phalna a pek tawh thu leh FK Oxygen Plant in thla hmasa bakah tun thla chhung a thlawna an pek mek thu bakah Civil Hospital Aizawl atangin mamawh dan a zirin thun khah leh na tur Oxygen bur ruak 50 lak theih reng a nih thu a sawi a, “Keimahni lam kan pipe te vanduai palh thila a puakte a nih ngawt loh chuan tun dinhmunah thlaphanna tur a la awm rih lo,” a ti bawk.

Heng bakah hian ZMC chu COVID-19 hri vei te enkawlna atan chauha ruahman a nih tawh thu te, a hmaa Male/Female Medical tihte pawh COVID Ward tia thlak vek a nih tawh thu sawiin, Emergency thilah leh Dialysis tih ngai te bak damlo dang, COVID-19 hri kailo te an awm tawh loh thu a sawi a. Covid Ward pawh mamawh dan a zirin tihbelh zel a nih tur thu leh tunah hian Covid Ward palina tur hawng tura an inbuatsaih mek thu a sawi bawk.

COVID-19 damlo enkawlna hmun tur bik damdawi In, ZMC ah hian tun dinhmunah Ward pathum-a khum te luah khah vek niin ICU awm zawng zawng a khah vek bakah damlo na zual enkawl ngai bik Ventilator hman tir mi 7 an awm mek bawk nia thudawn a ni.a