COVID-19 case pun chak dan leh kalhmang enin kan dinhmun a thalo ta takzet - Health Minister

Health Minister Dr. R. Lalthangliana chuan kan State-a COVID-19 case pun chak dan leh kalhmang enin kan dinhmun a thalo ta takzet tih sawiin, “Hetiang zêla kan kal chuan in tuamhlawm theilo dinhmunah kan lut thuai ang tih a hlauhawm hle a ni,” a ti.

COVID-19 Second Wave rawn thawk mek kara Mizoram dinhmun a sawifiahna ah he thu hi sawiin Health Minister chuan kum kalta chhûng zawng leh kumin March thla thleng khan India rama State zawng zawng zingah positive nei tlem ber leh nunna chan tlêmna ber kan nih laiin March thla tawp atang khan hri kai kan pung chak ta hle tih a sawi a. March thlaa hri kai 53 hmuhchhuah anih laiin April thla ah chuan mi 1655 lai hri kai kan neih belh thu leh, tun thla May ni 3 chhûng lekah hri kai 425 hmuhchhuah tawh niin, nunna chân pawh hemi chhûng hian mi 4 lai kan neih belh tawh thu a sawi a. India hmarchhak State zingah pawh kan dinhmun a thalo sâwt ta hle nia sawiin, Assam tih lohah chuan case pun chakna ber kan nih tak thu a sawi bawk.

COVID-19 hripui laka kan dinhmunin a ziaawm zawnga hma a sawn theih loh avangin kar hnih zet kan inkhuahkhirh hnuah, tunah hian a hma aia khauh lehzualin kar khat dang kan kal leh dawn tih sawiin Health Minister chuan, kil tin atanga teh hnua kan zawh tawk leh thatpui tlan theih tura min hrût rual thei tur ang bera kan hotute ruahman a ni tih hriain, midangte hriatthiamna nen kan beisei aia khawnglo a lo nih pawhin tha taka kan zawm chu kan himna tur a ni tih hre turin a chah a. “ Kan dinhmun hi a khirh tawh a ni tih kan hriat ka duh, khawvel ram ropuite leh India ram State hausa zawk te an talbuaina a ni tih kan hre vek a, kan Health Infrastructure in a zo lovang tih a hlauhawm takzet tawh,” tiin zep rual lovin Community Transmission hian kan zingah bu a khuar thûk tawh hle a ni tih kan hriat tlân a ngaih thu leh “Khawilai mah hi a him bik e tia han sawi ngam tur a awm ta lo,” a ti bawk.

Health Minister chuan COVID-19 dona hmanraw hrang hrang leh damdawi te a vâng tan hle tawh tih pawh sawiin, COVID-19 positive te enkawlna atana damdawi kan hman lar ber, Remdisivir pawh a hma anga duh duha lei tur a awm tawh loh thu leh, a black a lei tur takngial pawh a vang tawh hle tih a sawi a. Vaccine leh COVID-19 test kit chi hrang hrangte pawh a hma aiin lei tur hmuh a harsa tawh a, India ramin a mamawh ang zât hi a siamchhuaktuten theihtawp an chhuah chung pawhin an supply hneh tawhlo niin a sawi a. COVID-19 virus pudarhtu chu mihringte kan nih tlat avangin kai lo tura hma la thei chu keimahni theuh kan nih rualin, a thehdarh kawngah pawh mawh nasa takin kan phur theuh a ni tih hre turin mipuite a chah bawk.