Latest News

Mizoram-ah COVID-19 hri kai an pung chho zel

Niminpiah khan Mizoram-ah Sample 3517 enfiah niin COVID-19 hri kai 198 zet hmuhchhuah leh an ni a, Mizoram-a hri kai hmuhchhuah chu 6556 an tling tawh.

Niminpiah khan ZMC Laboratory-ah Sample 1500 enfiah niin hri kai mi 79 hmuhchhuah leh an ni a, heng hri kai hmuhchhuah te hi tunhnaia State pawn atanga rawn haw leh hri kai nen inkawmhnaihna neih avanga inkhunghrang lai te an ni a, an zingah hian Central Reserve Police Force (CRPF) mi 21 zet an tel bawk a ni. 

Niminpiah vek khan District hrang hranga TrueNat Laboratory-ah Sample 141 enfiah niin hri kai mi pahnih hmuh an ni bawk a, Siaha-ah hri kaina hriatloh pakhat hmuh niin Mamit-ah State pawn atanga rawn hri kai pakhat hmuh a ni bawk.

Mizoram-a niminpiah-a Rapid Antigen Test hmanga Sample 1170 enfiah atangin hri kai mi 120 zet hmuhchhuah an ni a, an zinga mi 11 te chu Lengpui Airport Screening Point atanga hri kai hmuh te niin Aizawl District chhung hmun hrang hrangah hri kai 61 hmuh an ni a, an zinga mi 16 te chu hri kaina hriatloh niin midang te hi State pawn atanga rawn haw leh hri kai tawh nen inkawm hnaihna nei te an ni. Siaha District-ah hri kai 30 hmuhchhuah niin Random Sample Test neih atanga hri kai hmuhchhuah an ni hlawm a, Lunglei District-ah hri kai mi 4 hmuh niin Kolasib District-ah hri kai 9 hmuh an ni a, Serchhip District leh Saitual District-ah hri kai mi 2 ve ve hmuh niin Lawngtlai District-ah hri kai pakhat hmuh a ni bawk.

Heti hian nimin thleng khan Mizoram-a COVID-19 hri kai hmuhchhuah tawh chu 6556 niin nimin khan mi 56 te enkawl dam leh an ni bawk a, heng te nen hian nimin tlai dar 5:00 thlenga Mizoram-a hri kai enkawl dam chu 5168 an tling tawh a, hei hi hri kai hmuhchhuah atanga chhutin zaa 78.82 niin tunah hian hri kai enkawllai 1371 an la awm a, hri kai zingah nunna chan 17 an awm tawh bawk a ni. Mizoram District hrang hrang 11-ah hri kai enkawllai an awm vek a, Aizawl District chu hri kai enkawllai tamna ber ni mekin 972 enkawllai an awm a ni.

Comments

Chhiar Hlawhte