Latest News

Thenzawl DFO hovin Bio-Diversity Day hman a ni

Inrinni kalta, May 22, 2021 khan khawvel pumah Bio-Diversity Day hman a ni a, Thenzawl DFO Office-a thawktu thenkhat te chuan he Ni pual hian thingtiak an phun a ni.


Bio-Diversity Day puala Thenzawl DFO Complex-a thingphunna hunah Thenzawl DFO, Margareth Lalramchhani chuan Bio-Diversity kan tih chuan khawvel a nungcha tinreng, Lei a awm chi te, Tui a awm chi leh Boruak-a awm chi zawng zawng a huam theih thu sawiin, heng te hi humhalha venhim a nih theihna turin kumtin May 22-ah thupui hrang hrang neia hman thin a ni tih a sawi a, kumin hian ‘We're part of the solution #ForNature’ tih chu thupui-ah hmangin, Mizo tawng chuan ‘Nang leh kei hi harsatna sukiangtu kan ni thei’ tihna a nih ber thu a sawi.

Mizoram hi Bio-Diversity Hotspot pali awm zingah Indo-Burman Region an tih a awm kan ni tih sawiin DFO chuan, “Kan State-ah hian nungcha, Tui-a awm chi (aquatic fauna) leh Lei a awm chi (terrestrial fauna) leh boruak a awm chi (avifauna) chi hrang tam tak an awm a, hei mai bakah hian thing leh mau (flora) tam tak kan nei bawk. Heng kan ram a nungcha zingah hian khawvel hmundang a awm ve lo (endemic) tam tak an awm thu a sawi a. Chu chu hriain ram hrang hrang atangin zirchiang duh, Researcher tam tak an lo luh thu leh, thiamna sang zawk leh hmuhchhuah thar neiin Degree thar nena haw tam tak an awm mek thu a sawi.

Thenzawl DFO chuan hetiang taka rohlu kan nei chung hian keini, a ram a chengte hian kan rohlu neih chhun, ramdang aia kan chungnunna, kan chhuan ve theih ber tur kan ram Bio-Diversity hi kan tichhe mek zel thung tih sawiin, “Kan kap a, kan hal a, kan kit thlu in kan vat darh zel mek a. Kan zavai-a kan inngaihtuah chian a va hun tawh takzet a ni,” a ti a. Kumin-a he Ni thupui in a sawi angin, mitin te hi harsatna sukiangtu ah kan tang thei tih sawiin, chumi atan chuan he ni-ah hian kan duhthlanna uluk taka hmanga harsatna kan tawh mek leh kan la tawh theih sukiang tura duhthlanna hmang turin a chah a. Kan ram Danpui-in Fundamental Duties min chhawpchhuah sak ah pawh, ‘To protect and improve the natural environment including forests, lakes, rivers, wildlife and to have compassion for living creatures’ tih a chuang tih pawh sawiin, “India khua leh tui kan nih angin, kan tih ngei ngei tur kan Danpui-in a sawi hi zawm thar ila, harsatna sukiangtu leh a siamthat hna thawktu nih i tum thar theuh ang u,” tiin mipuite chu a chah bawk a ni.

Comments

Chhiar Hlawhte