Latest News

Kan tum ber nunna chhanhim a ni - Health Minister

Health Minister Dr. R. Lalthangliana chuan COVID-19 hri leng kara an tum ber chu nunna chhanhim a ni tih a sawi.

Health Minister hian Inrinni khan Zoram Medical College (ZMC) tlawhin COVID-19 hri kai te enkawlna kawnga hmalakna te a en bakah hmalak chhunzawm dan turte a en a. He hunah hian Health Minister chuan COVID-19 Second Wave hian Mizoram-ah a zia a rawn thlak avangin kan rin phak bak harsatna kan tawk tih sawiin, hri kai tharte zingah symptom nei an pun bakah, a tira symptom nei lo, a hnua symptom nei ngaihtuahawm tak tak kan ngah sawt hle tih a sawi a. “Hmun dang kan ngaihthah dawn tih ni lovin, COVID-19 hri kai dinhmun ngaihtuahawm deuhte kan enkawlna hmun ZMC hi tun atan chuan kan insawrbing deuh a tul a, kan dinhmun thlir zelin damlo enkawlna tur khum leh an mamawh dangte kan ngaihtuah a tul,” a ti.

Health Minister hian tunhnaia Zoram Medical College-a Oxygen Generating Plant siam thar pawh tlawhin Oxygen Generating Plant hi tun dinhmunah chuan tluang takin a kal thei rih a, damlote mamawh pawh pekchhuah niin, Mizoram dinhmun thlirin hmanhmawh takin Oxygen Generating Plant dang pahnih siamna tur hmun laih mek a ni bawk a ni. ZMC-a COVID-19 hri kaite enkawlna tur Ward hrang hrang panga a khum awm zawng zawng tunah hian luah khah a ni a. Ward No. 6 sak mek chu Health Minister hian tlawh nghalin, a tul ang ang peihfel nghal tura tan la turin Contractor-te leh ZMC hotute a chah a, kan dinhmun a hriat loh avangin Thawhtanni-ah tal chuan damlo dahluh theihna tur khawpa peihfel a tul thu leh khum awm thei zat tur leh tul dangte rang taka lo zirchiang nghal turin a hrilh bawk.

Health Minister chuan he hripui kara kan tum ber chu nunna chhanhim a ni tih sawiin, Chief Minister zahawm tak pawhin hei hi a ngaih pawimawh ber a ni tih a sawi a, “Nunna chhan turin theihtawp kan chhuah zel dawn a ni,” a ti a. Hemi atana ZMC thuamthatna tura pawimawh te pawh inthlahrung lova sawi zel turin a chah bawk.

He hunah hian Medical Operational Team Chairman, Dr. ZR. Thiamsanga chuan damlo kan tam zela, khum kan indaih tawh si lova, thawktute an hahin an lu a hai tawh hle tih a sawi a, COVID-19 hri kai hmuhchhuah thar zingah symptom na taka nei (serious) an pung zel chuan an mang a ti ang tih sawiin, “ZMC-ah khum a tam thei ang ber kan dah a, kan insawrbing a ngai a ni,” a ti a, Zoram mipuite tawiawmna an mamawh takzet tih a sawi bawk. MOT Chairman chuan ZMC Ward thar-a khum dahbelh in a ken tel tur thawktu, a bikin Nurse leh a tul ang ang thawktu an tam dawn tih sawiin, hemi atan hian hma an lakna hrang hrangte pawh a sawi bawk.

Comments

Chhiar Hlawhte