Latest News

Tui harsatna thleng mek

Kumin-ah ruahtui ala tlak mumal loh avang leh Tuikum lui pump-na ah harsatna a awm zeuh zeuh avangin Serchhip mipui ten Tui harsatna an tawk mek.

PHE Department-a thawktute hnen atanga thui kan dawn danin Serchhip khawpui chawmna atanaPHE Department in Tuikum lui an lak bakah hian Sailam ram atangin Tuirum lui chu Gravity hmanga lak a ni a, hei hian Chhiah-tlang, New Serchhip Forest tlang leh DC Tlang-a Tuizemlian te a chawm tel thin a, heng bak atan hian Tuikum lui hi pump chhuah niin harsatna lutuk a thleng ngai lova. Amaherawh chu kumin hian Tuikum tui lakna ah Pipe leh khawl chhia a awm zeuh zeuh bakah Thal a nat avanga ruahtui a tlak mai tak loh bawk avangin Tuirum lui-a tui hi lak tur a awm mumal tawh lova, hei vang hian Serchhip khawpui chuan Tui harsatna a tawk mek a, tunah hian Veng hrang hrangte tana nitin a indawt-a tui sem dan an ruahman ang pawhin Tui hi sem theih a ni tawh rihlo a ni.

PHE Department hotute chuan Tuikum lui-a Tui pump chhuahna ah hian darkar khat-ah litre 82,000 pump theih a ni tih sawiin, darkar tin in Chhiahtlang lamah litre 15,000, New Serchhip a sem turah litre 60,000 leh IOC Booster Pump kaltlang-a pek ngai litre 65,000 atanga 70,000 vel a tul thu sawiin, mipui kan tam tawh si avangin hei hian min zo tawhlo tih an sawi a. Tunah hian Tuikum lui-ah erawh chuan Tui pump tur hi a tam thung avangin darkar khat-a Tui litre 200,000 bawr vel pump theihna turin khawl, Pipe Line, Tui tihthianghlimna leh Power Supply te an mamawh thu an sawi a, hetiang hi kan nei thei a nih chuan Tui harsatna kan tawh thin chu sutkian theih a nih thu an sawi bawk.

Thudawn danin PHE Department hian tunah hian Tuikum tui pump-na hmun bakah Khaw-tetlang-a Control Room leh Booster Pump bakah a semna hmunah te nikhat-a darkar 24 duty insiamin hna an thawk a, hei hi EE leh SDO te chuan an vil reng bawk a ni.

Comments

Chhiar Hlawhte