Latest News

Serchhip bialtu MLA atan Lalduhoma chu rinawmna thu tiam tira lakluh a ni ta

Serchhip bialtu MLA atana thlan thar Lalduhoma chu nimin khan rinawmna thu tiam tirin Serchhip bialtu MLA atan lakluh a ni ta.


26-Serchhip (ST) Assembly Constituency bye-election a thlantlin Lalduhoma MLA atana lakluhna inkhawm hi nimin chhun dar 12:00 khan Assembly Conference Hall, Assembly Annexe Building-ah neih a ni a, Assembly Commissioner & Secretary, H. Lalrinawma chuan kaihruaiin Assembly Speaker, Lalrinliana Sailo chuan rinawmna thu tiam tirin Member of Legislative Assembly (MLA) atan a lalut a, he hunah hian Home Minister Lalchamliana leh School Education Minister Lalchhandama Ralte bakah MLA-te Dr. ZR. Thiamsanga, Zodintluanga Ralte, KT. Rokhaw, Lalrindika Ralte, Dr. BD. Chakma, Vanlalhlana, Dr. Vanlalthlana leh Lalchhuanthanga te an tel a ni.

Tarlan tawh thin angin kum 2018 Mizoram Legislative Assembly inthlanpui-a Serchhip bialtu MLA atana thlantlin Lalduhoma hi Anti-Defection Law bawhchhia-ah MLA 12 te chuan puhin nikum khan Assembly Speaker hnenah an thlen a, hemi chungchang hi ngaihtuah a nih hnuah Speaker, Lalrinliana Sailo chuan nikum November 27 khan Assembly Member atang hian a disqualify a, hei vang hian Dan angin April 17 khan Serchhip bial-ah hian Assembly bye-election neih a ni a, he inthlanna ah hian Lalduhoma hi ZPM Party atanga ding lehin hneh takin thlantlin a ni a, amah hnaih bertu MNF Candidate, Vanlalzawma chu vote 2950 zetin a hneh a, MLA atana lakluh hun tura ruat hmasak tawh chu hri leng avanga sawn leh a nih hnuah Vawiin khan rinawmna thu tiam tirin MLA atan hian lakluh a ni leh ta a ni.

MLA atana Lalduhoma lakluh a nih hnu hian Assembly Speaker, Lalrinliana Sailo chuan 8th Mizoram Legislative Assembly-ah Mizo National Front (MNF) in MLA 27, Indian National Congress (INC) in MLA 5, Bharatiya Janata Party (BJP) in MLA 1, Zoram People's Movement (ZPM) in MLA 1 an neih thu leh Independent MLA 6 an awm thu puangin MLA thar lakluh inkhawm hi a titawp a ni.

Comments

Popular News (Last 30 Days)