Latest News

Chanchin thar thenkhat :

Zokhawthar-ah ASF hmu

Tunhnaia Champhai District chhung Zokhaw-thar-a Vawk thi te chuan African Swine Fever (ASF) hri an kai tih hmuhchhuah a ni. Champhai District Rapid Response Team on ASF te hian an thudawn bawhzuiin nimin khan Zokhawthar khuaa Vawk thi te hi an endik a, Rapid Antigen Test hmangin uluk taka endik a nih hnuah African Swine Fever a positive tih an hmuchhuak a. Khawl changkang zawk, RT-PCR hmanga endika finfiah turin Tissue Sample-te hi Special Messenger hmangin College of Veterinary Sciences & Animal Husbandry, Selesih panpui nghal a ni. Tun thla May 9, 2021 atanga nimin thleng khan Zokhawthar khuaah hian Vawk 25 zet an thi tawh nia chhinchhiah a ni a, Vawk thite hi sawngbawl dan tura inkaihhruaina siam anga phum bo nghal vek an ni.


Thu diklo a ni tih sawi

Mizoram Legislative Assembly Speaker, Lalrinliana chuan kumin March ni 15-a Mizoram Assembly Budget Session neih zawha House pawna Law Minister, TJ. Lalnuntluanga leh MLA C. Ngunlianchunga te inkara inhmuhthiamlohna thleng chungchanga CCTV Footage nawhreh a ni tih anga thu thang chu thu diklo a ni tih nimin a thuthar thehdarhtute a kawmna ah a sawi a, chanchinthar thehdarhtute kalkhawm hnenah pawh March ni 15 tlai-a thilthleng chu a entir bawk a, Social Media lama chanchin dik tawklo thehdarh anih thin chu pawi a tih thu a sawi bawk.


Hri danna la zo 51,260 awm

Nimin thleng khan Mizoram-ah COVID-19 hri danna Dose 1-na chu mi 2,28,713 hnenah pek ni tawhin mi 51,260 te hnenah Dose 2-na pek an ni tawh bawk. Mizoram-ah hian Health Care Workers mi 11,356 te chuan hri danna an lak tur ang la zo tawhin Frontline Workers mi 17,366 te chuan hri danna an lak tur ang an la zo tawh bawk a, kum 60 chunglam mi 18,155 leh kum 45-60 mi 4383 te chuan hri danna an lak tur ang an la zo tawh bawk a ni.


ZMC-a thawk ten hri kai

Tun thla ni 7-11 chhung khan VRDL, ZMC (Covid Laboratory) a thawk mi pathum chuan Covid-19 hri an kai tih hmuhchhuah niin hei vang hian VRDL hi khar rih a ngai dawn a. He Laboratory hi tihthianghlim (sanitize) a ngaih dawn bakah a thawk ve dangte pawh quarantine an ngaih dawn avangin May ni 12, 2021 hian RT-PCR hmanga sample test a tih theih dawn lova, May ni 13 hi chuan sample test chhunzawm leh theih in beisei a ni.


ASF vangin Vawk 2942 thi

Mizoram-a Vawk hri leng mek, African Swine Fever avanga nimin thlenga Vawk thi chu 2942 an tling tawh a, hri lenna hmuna Vawk thi zat hi a tlahniam tial tial niin thawktute chuan an sawi a ni. AH&Vety Department chhinchhiah danin henghri lenna hmunah hian Vawk 8185 awmin heng atang hian zaa 35.94 chu a thi a, hri leng tuar na ber khua, Lungsen-ah chuan nimin thleng khan Vawk 749 thi tawhin Vawk awm atanga zaa 74.08 a thi tawh a ni.

Comments

Chhiar Hlawhte