ICT Minister hovin sawiho

Mizoram chhunga inbiakpawhna (mobile phone) leh Internet Service tha zawk neih theih dan tur chungchang sawihona chu nimin khan Information & Communication Technology (ICT) Department Minister, Robert Romawia Royte hovin neih a ni.

Video Conference kaltlanga he sawihona hunah hian ICT Minister chuan tunlai khawvel-ah IT leh telecommunication tel lo chuan ni khat pawh kan awm thei tawh lo a, sawrkar Department hrang hrangten Internet leh Telecommunication chak tha zawk an mamawh thu a sawi a. COVID-19 hrileng avangin mipui tam tak kan inkhung mek tih pawh sawiin, zirlai ten online class an neih reng bakah online exam hrang hrang atan Internet Connectivity siam that vat a tul bawk tih a sawi a, tun hrileng avang hian hun dang zawng aiin Mizoram chuan internet service chak leh tha zawk kan mamawh thu leh Union Communication and IT Minister hnenah Mizoram Telecommunication system tichangtlung tura ngenna DO Letter a ziah thu a sawi bawk.

Minister chuan Mizoram-a Mobile phone leh Internet pe chhuak tu (Service Provider)-te chu tang lehzual tura a beisei thu sawiin, an harsatna tawh mek te chu bawhzui sak a inhuam thu a sawi a. Mobile phone leh internet service lama thawkte chu COVID-19 inkhuahkhirhna pawhin an hnathawh pangngai ti khaihlak lo turin khaw hrang hrangte a ngen bawk.

Mizoram in Internet Connection kan lakna pui ber, PGCIL chuan tunah hian Mizoram pum tan 200 Gbps a chak Bandwidth a pe mek a, online class leh tul dangah uar taka internet hman a nih tak hnu hian 100% hman zawh vek thin a ni a, chuvangin internet hmangtuten harsatna an tawh phah fo thin a. He harsatna chingfel tur hian PGCIL hian 100 Gbps bandwidth bun belh leh turin hma an la mek a. Hei hi thla hnih/khat hnuah chuan bun zawh theih beisei a ni.