Sawrkar hnathawk ten ni khat hlawh pe dawn

Federation of Mizoram Government Employees & Workers (FMGEW) bultuma sawrkar hnathawk Association hrang hrangte chuan COVID-19 dona atan an ni khat hlawh sawrkar-a thawh an remti.

Mizoram Chief Secretary in FMGE&W hruaitute kawma COVID-19 dona atan thawhlawm thawh ve tura a ngenna bawhzuiin nimin khan sawrkar hnathawk pawl hrang hrang 65 aiawh te chu FMGE&W huaihawtin Aizawl Vanapa Hall-ah an thukhawm a, he hunah hian pawl 39 aiawh ten an pawl ngaihdan sawiin, Association pathum tih loh chuan sawrkara thawhlawm thawh hi tha an ti a. Pawl pathumte chuan ngaihnathiam deuh an dil rualin, Meeting-in a remti lo a nih chuan tlanchhiat erawh an tum bik loh thu an sawi a. Heng pawl pathumte hi Frontline Worker lam vek an ni a, an Association-a Group C leh D-te chu ngaihnathiam tura an duhzual a ni bawk.

He thutkhawm a tel te hian a tam ber duhdan angin sawrkar-ah ni khat hlawh thawh tura thutlukna siamin, Association leh mimal harsatna bik neite chu tihluihna a nih loh angin, inthlahrung lo turin an ti a. Hetihlai hian pawl hrang hrang aiawh zingah sum dinhmunin a zirlo a nih chuan sawrkarin inrenchem lamah tan la ve se an duh thu sawi chhuak an awm nual. An ngaihmawh zualte chu SEDP Board 14, PAHOSS leh sum harsa tih reng laia contract inpek reng te a ni.