Latest News

Mizoram-ah mi 2045 enkawl theihna tur CCC awmin CCCC tur ngaihtuah belh zel a ni

Mizoram pumah COVID-19 hri kai te enkawlna tur hmun, Covid Care Centre (CCC) 36 awm mekin heng ah hian mi 2045 dah theih tura ngaih a ni a. Heng bakah hian CCC tur hi ngaihtuah belh zel niin Kohhran leh khawtlang hotute nen tangrualin Veng hrang hrangah Community Covid Care Centre (CCCC) ngaihtuah belh mek zel a ni bawk.

Nimin khan Health Minister, Dr. R. Lalthangliana hovin sawrkar mi pawimawhte leh Mizoram Kohhran Hruaitute Committee (MKHC) bakah sawrkar Department hrang hrang leh AMC hotute chuan Mizoram-a COVID-19 hri kai enkawlna hmun chungchang chu SAD Conference Hall-ah an sawiho a. He hunah hian Health Department hotute chuan Mizoram-a COVID-19 hri kai te enkawlna hmun dinhmun tarlangin, Mizoram pumah mi 2045 dah theihna CCC 36 awmin May ni 5, 2021 tlai dar 3:00 thleng khan COVID-19 hri kai 1069 an awm mek a. Aizawl District bikah tunah hian mi 873 awm theihna CCC 11 awmin May ni 5, 2021 tlai dar 3:00 thleng khan COVID-19 hri kai 613 an awm mek bawk.

Aizawl-ah Paid CCC pahnih - mi 12 dah theihna State Guest House, Lily Veng leh mi 29 dah theihna Tourist Lodge, Chaltlang ruahman niin hri kai mi 31 an awm mek a, Mizoram Rural Bank Office sak zawh hlim, MINECO ami chu Paid CCC atan ruahman tum mek a ni bawk.

Heng bakah hian Khawtlang leh Kohhran enkawl, Community Covid Care Centre (CCCC) chu Aizawl-ah 10 a awm mek a, Kohhran leh khawtlang hotute nen tangrualin veng hrang hrangah CCCC awm theihna tur en thlithlai mek niin, CCCC atan hian a hmun neih ringawt bakah thildang ken tel a ngah avangin uluk taka ngaih-tuah a tul thu sawi a ni a. Thingtlang lamah pawh hripui hi a darh tak zel avangin PHC awmna khaw hrang hrangte chu a tul veleha hman theih tur CCCC lo vauchher tura hriattir an nih tawh thu tarlan a ni bawk.

Khum 150 awm theihna Dawrpui Presbyterian Kohhran Pastor bial enkawl Agape Camping Centre, Durtlang ami leh khum 80 dah theihna Synod Revival Camping Centre, Neih-bawih ami te chu CCCC atan hman phalna hmuh a ni tawh a, Central YMA enkawl kum 63 awm theihna Lawipui-a Girls Hostel pawh CCCC atan hian hman a ni dawn bawk a, CCC, CCCC leh Home Isolation inkaihhruaina (SOP) pawh nimin khan duan fel hman beisei a ni bawk.

Comments

Chhiar Hlawhte